Komisaun Organizadora hahú halo preparasaun ba loron funsaun públika
DILI, 05 jullu 2022 (TATOLI)—Diretór Jerál Ministériu Administrsaun Estatál (MAE), Belarmino Filomeno Neves, hateten Komisaun Organizadora liuhosi MAE hahú kuarta (06/07) halo preparasaun ba loron funsaun públika ne’ebé sei komemora iha sesta (15/07) semana oin.
Notísia Relevante: Jornada “La’o Tuir Ain Fatin” sei hahú hosi Fatucalo to’o Sentru Ermori
“Ohin ne’e ita halo marsa ka olahraga santai hosi Ministériu Negósiu Estranjeiru no Koopersaun (MNEK) to’o iha jardin Largo Lecidere tanba atividade ne’e ita presiza halo hodi halo refresing, nune’e prepara ba aniversáriu funsaun públika nian ba dala-ualu (8) ne’ebé mak sei realiza iha loron 15 jullu 2022,” Belarmino Filomeno Neves informa via telefone ba Agência TATOLI, tersa ne’e.
Nia hatutan, liuhosi atividade ne’e mak bele halo ema saudável no aleinde ne’e iha mós atividade seluk hanesan dahur, marsa no poco-poco.
“Ita halo atividade marsa ne’e hanesan atividade depostiva ida hodi prepara ba jornada la’o tuir ain fatin Saudozo Nicolau Lobato nian,” nia dehan.
Ida-ne’e ajendadu ona hosi komisaun organizadora ba loron funsaun públika nian, nune’e aban mós hahú halo gladi ba atividade hotu-hotu ne’ebé relasiona ho komemorasaun loron nasionál funsaun públika nian ba daualuk iha tinan ne’e.
Komisaun organizadora hamutuk Komisaun Funsaun Públika (KFP) mós sei realiza tan semináriu nasionál iha 11-12 jullu 2022 ho tema “Hakbiit Servidór Estadu hodi Asegura Kualidade Servisu ba Públiku, iha Ámbitu Desentralizasuan Administrtaiva no Futuru Poder Lokál iha Timor-Leste”.
Semináriu ne’e sei partisipa hosi autoridade másimu sira iha nível munisípiu hamutuk ho Administradór Postu Administrativa sira iha territóriu nasionál.
Antes ne’e, Prezidente Komisaun Funsaun Públika (KFP), Faustino Cardoso Gomes, hateten atividade jornada la’o tuir ain fatin ba tinan 2022 sei hahú hosi suku Fatucalo ba to’o iha fatin istóriku ida naran Sentru Ermori iha Metinaro.
“Jornada la’o tuir saudozu Nicolau Lobato nia ain fatin hahú hosi suku Fatucalo, postu administrativu Turiscai, munisípiu Manufahi ba to’o fatin istóriku ida ho naran Sentru Ermori ne’ebé lokaliza iha suku Mantelolão, postu adminiatrativu Metinaro, Munisípiu Dili,” nia dehan.
Tuir planu, partisipante sira sei toba kalan rua iha dalan no loron tolu tomak jornada la’o tuir ain fatin no loron tolu sorin ne’e sei fila-fali mai Dili.
“Jornada la’o tuir ain fatin ne’e nia sentidu konfigurativu ne’e katak oinsá mak ita ba rona movimentasaun hosi ita-nia éroi boot Nicolau Lobato, aumezmu tempu ba komprende valór sira-ne’ebé mak ita-nia éroi sira komunga, ita-nia éroi sira realiza no hatudu durante prosesu luta ba libertasaun Nasionál ida-ne’e,” nia dehan.
Prezidente KFP ne’e hateten, KFP realiza jornada la’o tuir ain fatin iha loron funsaun públika ne’e tanba atu hametin liután sensu nasionalizmu no patriotizmu iha rai ida-ne’e.
“Objetivu no valór aas ne’e mak ita atu banati tuir prinsipiu no valór boot hosi saudozu sira husik hela, hodi hala’o ita-nia knar loron nian nu’udar servidór públiku ho kualidade, ho responsabilidade no hakaraik-an, ho sakrifisiu no mós kapasidade rejiliente hodi hasoru dezáfiu saida de’it, nune’e ita hamutuk bele lori povu hakbesik ba moris di’ak. Ikus, lori povu liberta sai hosi situasaun moras no nakukun laran, nune’e ho atividade ne’e sei hametin no halo luan di’ak liután ita-nia sensu nasionalizmu, sensu patriotizmu,” Faustino hateten.
Jornalista : Osória Marques
Editór : Cancio Ximenes
