Prezidente Komisaun Funsaun Públika (KFP), Faustino Cardoso Gomes. Imajen Tatoli/Francisco Sony.

DILI, 22 juñu 2022 (TATOLI)–Prezidente Komisaun Funsaun Públika (KFP), Faustino Cardoso Gomes, hateten, atividade jornada la’o tuir ain fatin ba tinan 2022 sei hahú hosi suku Fatucalo ba to’o iha fatin istóriku ida naran Sentru Ermori iha Metinaro.

“Jornada la’o tuir saudozu Nicolau Lobato ain fatin hahú hosi suku Fatucalo, postu Adminiatrativu Turiscai, Munisípiu Manufahi ba to’o fatin istóriku ida ho naran Sentru Ermori ne’ebé lokaliza iha suku Mantelolão, postu adminiatrativu Metinaro nian,” nia dehan ba Agência TATOLI, iha nia knaar fatin Matadouro, Dili, kuarta ne’e.

Tuir planu, partisipante sira sei toba kalan rua iha dalan no loron tolu tomak jornada la’o tuir ain fatin no loron tolu sorin fila mai Dili.

“Jornada la’o tuir ain fatin ne’e nia sentidu konfigurativu ne’e katak oinsa mak ita ba rona movimentasaun hosi ita-nia eroi boot Nicolau Lobato, aumezmu tempu ba komprende valor sira ne’ebé mak ita-nia eroi sira komunga, ita-nia eroi sira realiza no hatudu durante prosesu luta ba libertasaun Nasionál ida-ne’e,” Prezidente KFP ne’e hateten.

KFP realiza jornada la’o tuir ain fatin iha loron funsaun públika ne’e tanba atu hametin liután sensu nasionalizmu no patriotizmu iha rai ida-ne’e.

“Objetivu no valór aas ne’e mak ita atu banati tuir prinsipiu no valór boot sira husik hela, hodi hala’o ita-nia knaar loron nian nu’udar servidór públiku ho kualidade, ho responsabilidade ho hakaraik-an, ho sakrifisiu no mós kapasidade rejiliente hodi hasoru dezáfiu saida de’it, nune’e ita hamutuk bele lori povu hakbesik ba moris di’ak. Ikus, lori povu liberta sai hosi situasaun moras no nakukun laran, nune’e ho atividade ne’e sei hametin no halo luan di’ak liután ita-nia sensu nasionalizmu, sensu patriotizmu,” Faustino hateten.

Aleinde jornada la’o tuir ain fatin, nia esplika, iha mós atividade lubuk ida hanesan voleibol, futsall, dada tali, doasaun ran, la’o saudável, semináriu nune’e mós bazar barratu ne’ebé sei involve ministériu hotu-hotu.

Jornada la’o tuir ain fatin, tuir kalendáriu tentativa sei hala’o iha inisiu fulan-jullu no sei servisu hamutuk ho autoridade lokál sira no mós veteranu, tanba sira mak sai matadalan ida hodi bele realiza atividade ne’e.

Jornada la’o tuir ain fatin, hala’o dezde iha 2017 bazea ba rezolusaun Governu númeru 22/2017, ne’ebé hatuur katak iha 15 jullu nu’udar loron nasionál ba Funsaun Públika nian.

Tanba ne’e, iha 20 juñu liubá, KFP konvida mídia estatál rua hanesan Agência Noticiosa TATOLI, I.P ho RTTL, E.P hodi husu koolaborsaun mídia nian hodi halo kobertura ba jornada la’o tuir ain fatin ne’e.

Durante enkontru, RTTL, E.P no TATOLI, I.P prontu hodi servisu hamutuk ho KFP hodi asegura kobertura ba realizasaun atividade jornada la’o tuir ain fatin no sai mós parte ida ba sira nia progama pakote iha RTTL “Ain Fatin” no programa iha Tatoli “Ain Leut”.

Prezidente KFP hateten, iha tinan 2017-2019, KFP realiza jornada ne’e ba ona saudozu Nicolao dos Reis Lobato ba dala tolu no mós ba saudozu Vicente Reis “Sahe”. Iha tinan 2020-2021 atividade ne’e la realiza tanba pandemia COVID-19, entaun KFP realiza hikas iha tinan 2022, ne’ebé mak uma-na’in ba atividade komemorasaun Loron Nasionál Funsaun Públika mak Ministériu Administrasaun Estatal (MAE).

Programa ida-ne’e sei kolabora hamutuk ho Centro Nacional Chega (CNC), Ministériu Asuntu Kombatentes Libertasaun Nasional (MACLN) no Ministériu Turizmu Komérsiu no Indústria (MTKI).

Iha entidade sira-nia partisipasaun ne’e, CNC nia parte sei haree ba sinalizasaun fatin istóriku, MACLN sei haree ba istória rezisténsia nian no MTCI ninia parte haree ba programa sira-nian ba iha turizmu komunitáriu, inklui matadalan na’in-haat hosi postu administrativu Metinaro.

Nia informa, iha loron sesta (17/06) liubá ne’e hala’o idetifikasaun fatin hahú hosi aldeia Maunlara, suku Mantelolão, postu administrativu Metinaro, munisípiu Dili.

Jornada la’o ain, sa’e foho kuaze kilometru lima (5)-resin. Fatin ne’ebé ekipa avansada identifika iha postu administrativu Metinaro hahú hosi aldeia Maunlara, suku Mantelolão liu ba área Keorhatu, Kotomori, Manutoi no ikus Ermori, Bemori nu’udar fatin konsentrasaun primeiru Prezidente RDTL, Saudozu Nicolao Lobato, Fransisco Xavier do Amaral no Komisariu Polítiku sira seluk iha tempu rezisténsia.

Sentru Ermori, Bemori iha bee-matan ida ho naran Maukukus iha rai kle’an ida-ne’ebé hale’u hosi foho Manumulolo Mantoi, Aularan-Betulan, Bodoetutun, Leuskumari no foho Aiurtali pertense ba suku Mantelolão, postu Administrativu Metinaro, Munisípiu Dili no foho Aikurus, postu administrativu Remexio, munisípiu Aileu.

programa jornada la’o tuir ain fatin saudozu sira-nian ba dala ikus nian iha tinan 2022 ne’e sei envolve hosi liña ministeriál hotu iha VIII Governu Konstitusionál.

Jornalista : Osória Marques

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here