DILI, 05 jullu 2022 (TATOLI)—Diretór Nasionál Asisténsia Sosiál (DNSA), Lucas Tois, rekomenda ba Dirasaun Nasionál Servisu Rejistu Notariadu (DNSRN) ne’ebé tutela ba Ministériu Justisa (MJ) atu fasilita lista benefisiáriu “bolsa da mãe jerasaun foun” hodi prodús billete de identidade (BI).
Notísia Relevante: Pesoál rejistu “Bolsa da Mãe Jerasaun Foun” hahú rejista inan isin-rua
“Ita rekomenda ba DNSRN iha Ministériu Justisa atu fasilita prodús billete de identidade ba ita-nia benefisiáriu bolsa da mãe jerasaun foun, nune’e labele antrian hanesan iha Caicoli ne’ebá,” Lucas Tois informa ba Agência TATOLI, iha nia knaar fatin Caicoli, Dili segunda ne’e.
Tuir nia, atu sai benefisiáriu ba programa bolsa da mãe jerasaun foun mós tenke aplika domumentu rua importante hanesan kartaun eleitorál no billete de identidade.
“Tanba ne’e mak husu DNSRN atu tau prioridade ba benefisiáriu sira-ne’ebé sai pilotu alvu ba programa bolsa da mãe jerasaun foun iha Ainaro, Bobonaro no RAEOA. Signifika kartaun billete de identidade ne’e hetan prioridade ba ema-ne’ebé atu rejistu,” nia dehan.
Tanba, nia dehan, bainhira halo lansamentu abertura ba programa bolsa da mãe jerasaun foun iha Rejiaun Administrativa Espesiál Oé-Cusse Ambeno (RAEOA) ne’e, públiku husu pergunta katak mákina prodús BI iha RAEOA nian avaria ka la funsiona.
Bazea ba preokupasaun ene’e, nia kontinua husu ba DNSRN atu oinsá bele fasilita benefisiáriu programa “bolsa da mãe jerasaun foun” sira, nune’e bele ajusta kompleta ho sira-nia domumentu importante sira.
“Tanba bainhira ita rejistu ona iha sistema mak labele hanoin dehan osan tama ona iha ita-nia bankária, lae. Maibé, sei presiza tan billete de identidade no kartaun eleitorál ka billete de identidade ho pasaporte, maibé ita akompaña no hatene katak iha área remota ne’e populasaun maiória pasaporte laiha. Tanba ne’e, presiza ajusta mós BI,” nia esplika.
Nia dehan, karik benefisiáriu mak la ajusta entre dokumentu hirak-ne’e, sira-nia sei tama ba lista pendente nian.
Jornalista : Osória Marques.
Editór : Cancio Ximenes
