Ilustrasaun inan isin-rua. Imajen/Espesiál

DILI, 20 juñu 2022 (TATOLI)—Diretór Nasionál Asisténsia Sosiál (DNSA), Lucas Tois, informa pesoál rejistu ba programa “bolsa da mãe jerasaun foun”, segunda (20/06) ne’e, hahú rejista inan isin-rua ho simultaneamente iha Munisípiu Ainaro, Bobonaro no Rejiaun Administrativa Espesiál Oé-Cusse Ambeno (RAEOA).

Notísia Relevante: Lansa Bolsa da Mãe iha Ainaro, inan isin-rua sei simu $15

“Ami-nia pessoal rejistu ohin preparadu no hahú ona rejistu ba inan isin-rua iha Postu Saúde no Ospitál referál sira iha munisípiu tolu ne’e,” Diretór DNSA, hateten ba Agência TATOLI, iha nia knaar fatin Caicoli, Dili, segunda ne’e.

Responsável ne’e hatutan, foin sesta (17/06) semana kotuk, ekipa rejistu hamutuk ho Ministériu Solidariedade Sosiál no Inkluzaun (MSSI) ho Ministériu Saúde (MS) halo ona lansamentu bolsa da mãe jerasaun foun maibé ohin (segunda, 20 juñu) mak hahú.

“Ita foin rejistu ba ita-nia inan isin-rua sira hahú ohin ho simultaneamente tanba horibainhira semana kotuk ita só lori inan isin-rua reprezenta ida-rua mak rejistu hodi halo abertura no ohin mak ita loke rejistu ba inan isin-rua hotu iha munisípiu tolu ne’e,” nia esplika.

Nune’e, nia husu ba pesoál rejistu sira-ne’ebé atu atende ba inan isin-rua ho bebé tenke ho didi’ak.

Iha munisípiu tolu ne’e, pesoál rejistu hamutuk 85 ne’ebé kompostu hosi Ainaro na’in-24, Bobonaro 35 no RAEOA 26, no tuir planu kada sentru saúde ne’e sei destaka pesoál rejistu ema na’in-ida (1).

Dados estimasaun ba programa “bolsa da mãe jerasaun foun” hamutuk 27.432 ho montante orsamentu millaun $6,9.

Dekretu-lei númeru 22/2021, ko’alia kona-ba kria subsídiu ba inan grávida no labarik sira-ne’ebé mak hanaran “bolsa da mãe jersaun foun”, ne’ebé mak halo altersaun dahuluk ba dekretu-lei númeru 18/2012, 04 abríl.

Jornalista  : Osória Marques

Editór        : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here