DILI, 01 jullu 2022 (TATOLI)– Governu liuhosi Sekretáriu Estadu Juventude no Desportu (SEJD) hahú prosesa atu halo transferénsia subsídiu ba atleta sira ne’ebé iha prestasaun di’ak no konsege hetan medalla iha SEA Games 2022, iha Vietname.
“Ami prosesa ona subsídiu ba atleta sira ne’ebé foin lalais hetan medalla iha SEA Games, nune’e segunda semana oin, haruka ba finansa sentrál atu transfere ba konta federasaun nian, hanesan Atletizmu no Boxe hafoin federasaun fó ba atleta sira,” Diretór Administrasaun no Finansa Sekretáriu Estadu Juventude no Desportu (SEJD), Guido Monteiro, hateten ba Agência TATOLI iha edifísiu SEJD, sesta ne’e.
Nia dehan, loloos federasaun desportiva tolu mak hetan subsídiu tanba atleta hosi modalidade Atletizmu, Boxe no Taekwondo, maibé Taekwondo sei iha fallansu tékniku uitoan ne’ebé sei halo transferensia uluk ba Atletizmu no Boxe, hafoin tuir fali mak Taekwondo.
“Totál proposta orsamentu Boxe nian hamutuk $12.000 no atletizmu nian $15.000, ne’ebé ami transfere ba federasaun mak federasaun foti entrega ba atleta. Ami garante ba iha finansa no buat hotu loos ona loron tolu deít osan tama ona iha sira nia konta,” nia kompromete.
Antes ne’e, Governu entrega ona plaka ho montante osan hamutuk $7,500.00 ba atletizmu tanba hetan segundu lugar iha kurida metru 5.000 no metru 10.000, ne’ebé plaka ne’e simu direta hosi atleta Felisberto de Deus.
Enkuantu, modalidade boxe entrega plaka ho montante $7,500.00 tanba hanesan segundu lugar ne’ebé simu direita hosi atleta Delio Mouzinho, terseiru lugar Boxe nian simu hosi atleta José Quintas ho montante $4,000.00.
Enkuantu Taekwondo nian ne’ebé sai mós terseiru lugar simu hosi atleta Santina Adelaide de Sousa ho montante 4,500.00.
Notísia relevante: Lori fila medalia husi SEA Games, Governu atribui prémiu ba atleta inklui bolsa estudu
Jornalista: Hortencio Sanchez
Editór : Florencio Miranda Ximenes