iklan

EKONOMIA, DILI, HEADLINE

SEJD presiza habelar programa apoia fundu ba grupu joven kreativu

SEJD presiza habelar programa apoia fundu ba grupu joven kreativu

Administradór Postu Administrativu Dom-Aleixo José de Jesus. Imajen/Hortencio Sanchez

DILI, 29  juñu 2022 (TATOLI)– Administradór Postu Administrativu Dom-Aleixo, munisípiu Dili, José de Jesus, hato’o apresiasaun ba Sekretáriu Estadu Juventude no Desportu (SEJD), liuhosi programa estímula empreendedorizmu sosiál ba juventude tanba bele hadi’a joven-sira nia moris liuhosi vida negósiu, agrikultura no hortikultura, pekuária no peska.

“Programa ne’e di’ak tebes hodi fó oportunidade ba joven kreativu sira atu organiza aan no simu responsabilidade ba rekursu ka fundu ne’ebé ajudu hosi Governu liuhosi SEJD,” dehan Administradór ne’e ba Agência TATOLI iha edifisiu administrasaun Dom-Aleixo Dili, kuarta ne’e.

Notísia relevante: SEJD apoia fundu ba grupu joven kreativu 408 iha territóriu nasionál

José de Jesus dehan, iha postu administrativu Dom-Aleixo ne’e grupu juventude ne’ebé sai benefisiáriu  hamutuk 23 ne’ebé hala’o atividade iha área negósiu no kria kooperativa.

Nia observa grupu joven kreativu ne’ebé sai benefisiáriu ne’e hala’o sira nia atividade ho susesu tebes.

“Husu ba joven sira atu halao atividade sira ne’e ho responsabilidade, atu nune’e jere osan ne’ebé sira hetan hosi negósiu sira labele naben fali, maibé tenke buras ba bebeik hodi hadia joven sira nia moris, maski buat ki’ik imi nia seriedade mak halo buat ne’e bele sai boot iha futuru fó moris ba imi no ba nasaun,” nia dehan.

Nune’e, nia husu ba SEJD atu habelar liután programa ne’e ba juventude hotu tanba iha baze joven barak mak iha kreatividade, maibé laiha fundu.

“Ita haree joven kreativu barak iha baze sei moris iha terus no susar, maibé liuhosi programa ne’e bele bele tulun ona joven kriativu sira hala’o atividade hodi muda sira nia moris,” nia afirma.

Programa ne’e realiza tanba kompromisu VIII Governu Konstitusionál ba joven sira atu lori ba hala’o atividade produtivu hodi kontribui ba dezenvolvimentu ekonómika no kontribui mós ba prosesu rekuperasaun ekonomia ne’ebé Governu hala’o hela iha territóriu nasionál.

Programa estímulu empreendedorizmu juventude suku sei fó espasu ba joven timoroan sira atu esplora sira-nia poténsia no espresa sira-nia kapasidade nu’udar forsa kriativa ida ne’ebé bele kontribui ba komunidade no nasaun nia dezenvolvimentu ekonomia no sosiál.

Ba sentru juventude hotu iha territóriu nasionál SEJD aloka osan hamutuk $630.000 hodi realiza programa estimula ida-ne’e. nune’e, juventude sira bele dezenvolve an liu-liu uza atu dezenvolve sira-nia kriatividade hanesan, prodús lixu sai batako, balun kuda ai-fuan, kuda-modo, hakiak animál no atividade arte sira ne’ebé bele hatama fali reseita ba grupu sira.

Iha tinan 2021, SEJD fó ona fundu ba grupu joven kreativu ne’ebé sai benefisiáriu hamutuk 408.

Totál grupu benefisiáriu mak iha Aileu grupu hamutuk 45, Ainaro grupu 32, Bobonaro grupu 40, sentru juventude Becora-Dili iha grupu 27, Comoro iha grupu 23, Covalima iha grupu 26, Ermera iha grupu 52, Lautem iha grupu 44, Liquiça iha grupu 32, Manatuto iha grupu 34, Manufahi iha grupu 27, RAEOA iha grupu 22, Viqueque iha grupu 33.

Hosi programa empreendedorizmu ba juventude ne’e kada grupu halo atividade ne’ebé la hanesan balu hakiak ikan, manu, kuda modo, ai-fuan, hakiak karau no seluk tan.

Notísia relevante:  SEJD lansa programa nasionál estímulu empreendedorizmu

Jornalista: Hortencio Sanchez

Editór      : Florencio Miranda Ximenes

iklan
iklan

Leave a Reply

iklan
error: Content is protected !!