Sekretáriu Estadu Juventude no Desportu, Abrão Saldanha. Imajen Tatoli /Egas Cristovão

AILEU, 15 jullu 2021 (TATOLI) –Sekretáriu Estadu Juventude no Desportu (SEJD), Abrão Saldanha, kinta ne’e, lansa programa estímulu empreendedorizmu sosiál juventude suku iha Munisipiu Aileu.

Notísia Relevante : SEJD vizita Ensinu Tékniku Vokasionál Aileu

Programa ne’e realize tanba kompromisu VIII Governu Konstitusionál ba joven sira atu lori ba hala’o atividade produtivu hodi kontribui ba dezenvolvimentu ekonómika no kontribui mós ba prosesu rekuperasaun ekonomia ne’ebé Governu hala’o hela iha territóriu nasionál.

Programa estímulu empreendedorizmu juventude suku sei fó espasu ba joven timoroan sira atu esplora sira-nia poténsia no espresa sira-nia kapasidade nu’udar forsa kriativa ida ne’ebé bele kontribui ba komunidade no nasaun nia dezenvolvimentu ekonomia no sosiál.

“Vantajen demográfika ida ne’ebé Timor-Leste iha kuaze 75% hosi ita -nia populasaun ho idade menus hosi tinan 35. Governu konsiente katak realidade ida ne’e oferese poténsia no oportunidade boot ba ita-nia dezenvolvimentu,” SEJD Abrão Saldanha hateten bainhira lansa programa refere.

Abrão Saldanha haktuir, programa refere laos atu fahe osan no la fó apoiu ba inisiativa foun sira. Programa ne’e hanesan estímulu inisiativa produtivu sira ne’ebé eziste ona atu tulun joven sira hodi haluan liu-tan sira-nia kapasidade.

Iha fatin hanesan jerente sentru juventude  Aileu,  José Valente Borges da Costa, hateten lansamentu ne’e hanesan programa nasionál ida ne’ebé lansa iha Aileu. Iha ne’ebé  kobre hosi sentru juventude hotu iha munisípiu 12 inklui RAEOA.

Ba sentru juventude hotu iha territóriu nasionál SEJD aloka osan hamutuk $630.000 hodi realiza programa estimula ida-ne’e. nune’e, juventude sira bele dezenvolve an liu-liu uza atu dezenvolve sira-nia kriatividade hanesan, prodús lixu sai batako, balun kuda ai-fuan, kuda-modo, hakiak animál no atividade arte sira ne’ebé bele hatama fali reseita ba grupu sira.

Promete dezenvolve desportu komunitáriu

Sekretáriu Estadu Juventude no Desportu (SEJD), Abrão Saldanha, promete sei dezenvolve desportu komunitáriu iha Postu Administrativu Liquidoe, Laulara ho Aileiu Vila, Munisípiu Aileu.

Mekanizmu dezenvolve hahú hosi jogu eskolár sira no kompetisaun ne’ebé lidera hosi autoridade sira no SEJD prontu apoiu orsamentu, farda no seluk tan.

Sekretáriu Estadu Abrão Saldanha bainhira reuniaun ho estrutura Konfederasaun Desportiva Timor-Leste (CDTL- sigla Portugés) promete katak orsamentu ne’ebé atu aloka ba desportu nasionál sei ko’a metade hodi aloka ba dezenvolve desportu komunitáriu sira iha área rural.

Objetivu SEJD nian atu dezenvolve desportu komunitáriu ne’e atu hakbesik liután desportu ba sosiedade tanba joven barak iha área rural iha talentu ne’ebé di’ak.

Domingos Andrade hanesan komunidade hosi Postu Administrativu Lequidoe, kontente tanba Sekretáriu Estadu Juventude no Desportu (SEJD) promete atu dezenvolve desportu komunitáriu iha sira-nia postu.

Maria de Jesus hanesan estudante iha Eskola Ensinu Tékniku Vokasionál (ETV) Aileu mós hateten, sente kontente tebes tanba SEJD iha tempu besik sei dezenvolve desportu komunitáriu hahú hosi eskola sira.

Ho apoiu Governu ne’ebé iha, komunidade no juventude Aileu  iha ona esperansa atu pratika desportu ho di’ak liután tanba iha prestasaun di’ak bele identifika ba pratika iha nasionál.

Jornalista       : Hortencio Sanchez

Editór             : Francisco Simões

HAKEREK NO HATÁN

Please enter your comment!
Please enter your name here