BAUCAU, 27 juñu 2022 (TATOLI) – Ministru Planu no Ordenamentu (MPO), José Maria dos Reis, husu entidade hotu atu halo reflesaun kle’an iha implementasaun Planu Estratéjiku Dezenvolvimentu (PED) 2011-2030 tanba meta balun labele konsege finaliza.
José Reis ko’alia kestaun ne’e bainhira hala’o konsulta públiku ho autoridade lokál, kargu xefia munisípiu Baucau kona-ba reajustamentu Planu Estratéjiku Dezenvolvimentu (PED) 2011-2030.
Vise Primeiru Ministru ne’e hateten, partisipasaun hosi autoridade munisípiu, líder komunitária sira konstribui hanoin durante hala’o konsulta públiku ne’e iha munisípiu hotu no tenke envolve fali povu iha prosesu dezenvolvimentu tanba transformasaun iha povu nia leet.
Notísia relevante: Bankada Frente-Mudança: “Avalia PEDN tenke ho konsensu nasionál”
Vise Primeiru Ministru ne’ebé akumula mós funsaun nu’udar Ministru Planu no Ordenamentu ne’e konsidera Timor-Leste presiza halo reflesaun ne’ebé kle’an, liuliu prosesu dezenvolvementu to’o iha ne’ebé ona, saida mak seidauk halo, saida mak halo ona, liuliu povu nia halerik hanesan bee-moos, infraestrutura, estrada no dezempregu.
“Presiza halo reflesaun ida-ne’ebé kle’an, ita la’o iha dalan loos ka dalan sala,” Vise Primeiru Ministru no Ministru Planu no Ordenamentu hateten iha Sentru Konvensaun Baucau (CCB, sigla Portugés) Vla Antiga, segunda ne’e.
Governante ne’e fundamenta, Governu kria instrumentu importante rua hanesan planu nasionál ordenamentu territóriu no planu ordenamentu munisipál nune’e sai matadalan ba dezenvolvimentu inklui reajusta PED 2011-2030 ba 2011-2038 tuir karaterístika, pontensialidade tuir munisípiu ka rejiaun idak-idak nian.
“Bainhira laiha instrumentu rua ne’e, ita halo dezenvolvimentu estratéjiku sei namlele tanba la integradu,” José Reis akresenta.
Tuir planu MPO sei finaliza planu planeamentu estratéjiku integradu no ordenamentu territóriu no munisipál iha fulan-outubru tinan-ne’e atubele hetan aprovasaun hosi Konsellu Ministru nu’udar lei.
Konsellu Ministru aprova rezolusaun hodi harii komisaun interministeriál atu halo reajustamentu PED 2011-2030 ne’ebé lideradu hosi Primeiru Ministru Taur Matan Ruak, Vise primeiru mMnistru I no II, Ministra Negosiu Estranjeiru no Kooperasaun (MNEK), Ministru Admistrasaun Estatal (MAE), Ministru Koordenadór Asuntu Ekonomiku (MKAE) ne’ebé teknikamente elaborasaun reajustamentu PED lidera direita hosi Ministru Planu Ordenamentu (MPO).
Prosesu reajustamentu hahú konsulta ho nível lideransa sira komposta hosi Igreja, Sosiedade Sivíl, Organizasaun Defisiente iha tinan-2021 no inísiu tinan-2022 kontinua iha munisípiu atu husu opiniaun hodi fó hanoin kona-ba reajustamentu.
PED hanesan dokumentu estratéjiku ne’ebé akumula ema hotu nia aspirasaun kona-ba futuru Timor-Leste atu sai nasaun forte no prósperu iha tinan 20 mai ho vizaun katak to’o 2030 Timor-Leste sei sai nasaun ne’ebé iha rendimentu médiu-altu ho populasaun ne’ebé saudavél, edukadu no seguru.
Totál meta iha PED 2011-2030 hamutuk meta 232 ne’ebé fahe ba faze implementasaun tolu hanesan faze dahuluk hamutuk meta 129.
Hosi meta 129 ne’e konklui meta 40, besik konklui 27, faze daruak meta 71, besik konklui 13 no konklui meta 19, faze daruak meta 32 maibé seidauk halo avaliasaun tanba iha prosesu implementasaun.
Notísia relevante: PM otimista OJE 2022 momentu importante reajusta PED 2011-2030
Jornalista : Natalino Belo
Editór : Evaristo Soares Martins
