Xefe Bankada Frente-Mudança (FM), Deputada Isabel Maria Barreto Freitas Ximenes. Imajen TATOLI/Evaristo Soares Martins.

DILI, 17 setembru 2020 (TATOLI)—Bankada Frente-Mudança (FM) iha Parlamentu Nasionál konkorda halo avaliasaun ba Planu Estratéjiku Dezenvolvimentu Nasionál (PEDN) maibé tenke liuhosi konsensu nasionál.

Notísia Relavante: Bankada FRETILIN husu re-avalia PEDN

“Frente-Mudança nia hanoin katak atu muda Planu Estratéjiku Dezenvolvimentu Nasionál labele maibé ita bele avalisaun hodi haree saida mak la la’o hodi hadi’a ho maneira saida de’it.  Planu ne’e trata tiha ona ho períodu ne’ebé determinadu tiha ona, ita labele muda iha periódu klaran, ne’e, deklarasaun FRETILIN ne’e seidauk akontese. Ha’u hanoin presiza konsensu polítiku no konsensu nasionál, diálogu ho nível la’ós partidu iha Governu maibé tenke envolve tomak,” Xefe Bankada Frente-Mudança (FM), Deputada Isabel Maria Barreto Freitas Ximenes, informa ba jornalista sira, iha resintu Parlamentu Nasionál, kinta ne’e.

Xefe Bankada FM ne’e sente katak avaliasaun ba Planu Estratéjiku Dezenvolvimentu Nasionál importante nune’e haree ida-ne’ebé mak atinje ona no ida-ne’ebé mak seidauk atinje

“Saida mak presiza hadi’a maibé ho respeitu tomak ba partidu FRETILIN maibé tenke hanoin katak buat ne’e la’ós partidu sé de’it mak iha Governu mak halo ida-ne’e maibé presiza konsensu nasionál ne’ebé mak entidade hotu-hotu tenke envolve iha laran,” Xefe Bankada FM ne’e fó hanoin.

Nia subliña, atu halo avaliasaun labele partidu ida sente planu refere ninia objetividade tanba avalisaun kada partidu la hanesan ho avaliasaun mai hosi entidade tomak ne’ebé sente ba dezenvolvimentu hosi planu ne’e.

“La’ós partidu ida ka rua mak sente mesak, ida sente ne’e mak povu tomak entaun tenke mai hosi konsulta populár ida-ne’ebé mak halo ba povu tomak, mesmu ke ukun FRETILIN nian ka ukun CNRT nian, avaliasaun só mai hosi povu, labele hosi fali partidu ida mak halo avaliasaun”, katak nia.

Xefe Bankada Frente-Mudança ne’e akresenta, haree ba implemetasaun PEDN durante tempu balu hasoru hela impase políika no buat sira seluk.

“Iha nasaun ne’ebé de’it asvezes ita planeia planu 10 ita só bele halo rua. Ne’ebé, ba ami normál ita-nia nasaun mós enfrenta hela situasaun ne’e, tanba ne’e mak ita hotu hamutuk halo avaliasaun depois mak ita haree bele ka lae, ita hadi’a,” Deputada Maria Isabel fó hanoin ba entidade tomak.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here