iklan

NASIONÁL, JUSTISA, HEADLINE

Advogadu suspeitu tolu kazu tráfiku umanu husu aplika TIR

Advogadu suspeitu tolu kazu tráfiku umanu husu aplika TIR

Suspeitu tolu kazu tráfiku umanu, akompaña hosi Advogadu no família, submete ba primeiru interrogatóriu, iha TDD, sábadu (25/06). Imajen Tatoli/Natalino Costa

DILI, 25 juñu 2022 (TATOLI)–Tribunál Distritál Dili (TDD), sábadu ne’e, halo julgamentu primeiru interrogatóriu ba suspeitu na’in-tolu MVT, HS no JG, ne’ebé fasilita timor-oan hitu bá serbisu iha Dubai, Uniaun Emiradu Árabe (UEA).

Suspeitu sira to’o iha TDD iha tuku 12:30, akompaña hosi Polisia Sientífika Investigasaun Kriminál (PCIC, sigla portugés) no submete ba prosesu primeiru interrogatóriu kuaze oras hitu nia laran, hahú 12:00 liu to’o 19:00, ne’ebé partisipa hosi família sira.

Notísia relevante: PCIC detein suspeitu nain-tolu ba kazu tráfiku umanu

Liuhosi prosesu ne’e, Ministeriu Públiku (MP) akuza arguidu sira ho krime tráfiku umanu no krime organizadu, ne’ebé previstu iha artigu 163 hosi kódigu penál Timor-Leste.

Tuir Advogadu privadu hosi suspeitu sira, Pedro Aparício, prosesu atu tama ona iha alegasaun finál.

“Ministériu Públiku husu ba Tribunál atu aplika medida koasaun prizaun preventiva ba suspeitu sira, maibé ohin ha’u hanesan parte Defeza husu atu aplika Termu Indentidade Rezidénsia (TIR) ba suspeitu sira, maibé ida-ne’e maka juíz sei tetu hodi foti desizaun,” Advogadu privadu informa iha TDD.

Nune’e, iha domingu (26/06) tuku 11:30 dadeer juíz sira seikontinua julgamentu hodi foti desizaun finál ba kazu ne’e.

Hafoin ramata julgamentu primeiru interogatóriu iha TDD, ekipa PCIC lori fila suspeitu sira hodi detein iha sela detensaun, Caicoli.

Audiénsia julgamentu prezide hosi juíz singular Afonso Carmona, Ministériu Públiku reprezenta hosi Domingos Goveia no suspeitu sira hetan asisténsia legál hosi Defezór Públiku Humberto Alves no Advogadu privadu Pedro Aparício.

Jornalista  : Natalino Costa

Editora       : Julia Chatarina

iklan
iklan

Leave a Reply

iklan
error: Content is protected !!