Prezidente Partidu Os Verdes de Timor-Leste, António Lela Huno. Imajen TATOLI/Francisco Sony

DILI, 23 juñu 2022 (TATOLI)–Prezidente Partidu Os Verdes de Timor, António Lela Hunu, klarifika ba públiku katak partidu refere laiha desizaun koletivu hosi estrutura atu haruka timoroan sira ba servisu iha rai-li’ur

Notísia Relevante: Timoroan na’in-hitu “terus” hela iha Dubai

Dirijente Partidu Os Verdes de Timor ne’e hateten, iha ema individu balun hosi partidu nia laran mak iha ajénsia rasik hodi fasilita no ajuda timoroan sira ba serbisu iha rai-li’ur ho objetivu atu fasilita de’it timoroan sira no hakarak atu halo redusaun ba númeru dezempregu iha Timor-Leste.

“Hanesan partidu, seidauk iha orientasaun formál ida atu hahú prepara membru sira ba serbisu iha rai-li’ur, só ida-ne’e mak ha’u hakarak konfirma ba iha públiku,” Prezidente Os Verdes de Timor, António Lela Hunu, hateten ba Agência Tatoli liuhosi telefónika.

Dirijente ne’e mós hakle’an liután katak partidu ne’e órgaun koletivu, nune’e mak kualker desizaun tenke mai ho desizaun koletivu iha partidu nia-laran.

Hatán kona-ba responsabilidade partidu nian ne’ebé mak fasilita joven sira ba iha rai-li’ur, nia parte hatán, ne’e la’ós responsabilidade partidu nian tanbá timoroan hirak-ne’e rejistu ba iha ajénsia ida mak fasilita sira.

“Ha’u hanoin ajénsia iha Timor, se la sala iha ajénsia tolu ka haat hanesan ne’e mak iha timor, ne’e mak fasilita timoroan sira ne’e,” nia dehan.

Iha informasaun balun katak ajénsia ne’e mós iha partidu nia laran, nia hatán, ida-ne’e la loos tanba individu ka partidu nia ema ida mak harii ajénsia maibé la reprezenta partidu Os Verde de Timor.

Nune’e, timoroan sira-ne’ebé mak agora daudaun ba no servisu iha Portugál ne’e ajénsia sira iha Timor mak fasilita sira ba iha Portugál, maibé liga ba informasaun hosi rede sosiál katak Partido Os Verdes de Timor mak haruka timoroan ba iha Portugál ne’e, nu’udar Presidente Partidu rekonese katak nia emar servisu iha rai-li’ur.

“Ha’u-nia membru barak mak ba iha estranjeiru. Ha’u sente katak, ne’e sira-nia direitu, sira simpatia, sira-nia loyal ba iha partidu. Ha’u hanoin partidu iha duni vizaun ba ida-ne’e, partidu nia mehi ba ida-ne’e. Infelizmente partidu seidauk iha akordu legál ho Partido Os Verdes de Timor ninia membru hotu, atu hahú bele hala’o ida-ne’e,” dehan nia.

Nia dehan, agora dadauk nia parte hela no servisu iha Inglatera United Kingdom, hodi buka dalan ba joven sira atu bele servisu iha rai-li’ur.

“Nu’udar Presidente Os Verdes de Timor ho komisaun ida foin mak halo relasaun bilaterál entre os Partidos Os Verdes iha Eropa, tanba ne’e mak bainhira iha oportunidade di’ak, ita bele buka dalan oinsá, atu ita bele haree buat sira-ne’e,” nia dehan.

Entretantu, Prezidente interinu Frente Mudança, Ricardo Nheu, rekonese katak, ninia partidu hala’o hela formasaun no rekrutamentu ba timoroan sira atu ba serbisu iha rai-li’ur hanesan Malazia no Polandia.

“Ha’u hanoin partidu ema barak mak atu ajuda, nune’e mak ami realiza formasaun sira hodi bele lori joven sira ba serbisu iha rai-li’ur,” nia dehan.

Formasaun lian ingleza, lian Korea Selatan, lian Xina ne’e realiza tanba ema pesoál balun iha partidu nia-laran mak balun sai na’in ba ajénsia, entaun husi partidu rasik apenas fasilita de’it ho formasaun, ho objetivu atu aumenta de’it sira-nia kapasidade.

“Ha’u hanoin nu’udar partidu polítiku, nia labele haruka ema ba iha rai-li’ur, maibé ajuda fó formasaun no informasaun de’it. Signifika katak la’ós partidu mak haruka maibé ajénsia mak haruka sira ba iha rai-li’ur,” nia dehan.

Nia haktuir tan katak to’o ne’e daudaun ajénsia ne’e rasik haruka ona timoroan balun ba iha Malázia, no agora daudaun nain 17 mós atu ba tan.

“Ha’u hanoin kona-ba Polandia, ajénsia prepara ema liu 100 hanesan ne’e, atu arranka mós ba iha Polandia,” nia hateten.

Hatan kona ba bainhira mak atu ba Polandia, nia parte seidauk hatene katak ba fulan ida-ne’e ka fulan oin.

Notísia Relevante: Bankada KHUNTO-CNRT preokupa joven sira buka servisu iha rai-li’ur

Jornalista : Domingos Piedade Freitas/Osoria Marques

Editór          : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here