Prezidente Repúblika, José Ramos Horta. Imajen Tatoli/António Daciparu

DILI, 23 juñu 2022 (TATOLI)–Prezidente Repúblika (PR), José Ramos Horta, husu ba Governu atu repatria timor-oan na’in-hitu, ne’ebé daudaun iha hela iha Dubai, Uni Emiradu Arabé (UEA).

“Ha’u la koñese kazu ne’e, maibé informasaun faktuál duni ka lae, ka fake news, karik ha’u la hatene ida-ne’e. Buat ida ha’u hatene maka to’o agora laiha ajénsia ruma lejítimu haruka ema bá Dubai, atu bá maibé semana ruma tan, ne’e liuhosi meiu buat hotu-hotu legál. Sira na’in-hitu ne’e ha’u la hatene maibé karik konfirma duni ema sira ne’e vítima ha’u konkorda Governu tenki ajuda repatria sira mai Timor-Leste,” PR Horta hateten iha ámbitu vizita ba fábrika bebida Heineken, iha Hera, kinta ne’e.

Notísia relevanteTimoroan na’in-hitu “terus” hela iha Dubai

Timor-oan na’in hitu mesak feto ho inisiál BS, ECdR, L, P, M, A, A daudaun ne’e iha Dubai, tanba empreza ne’ebé fó serbisu laiha konkordánsia di’ak ho sira no sira-nia dokumentu empreza rasik mak rai, úniku sira subar hela telemovel hodi kontaktu.

Tanba ne’e, Xefe Estadu husu ba entidade relevante atu halo intervensaun ba aktu irresponsável sira.

“Tribunál tenki halo intervensaun hodi ema sira ne’e hetan punisaun maka’as,” nia akresenta.

PR apela ba timor-oan sira atu kuidadu ho ajénsia sira ne’ebé trata dokumentu viajen tenke konfirma didi’ak.

“Se iha posibilidade bá serbisu tuir regra no tuir ajénsia ne’ebé profisionál hodi trata buat sira ne’e liuhosi baze legál. Ha’u konkorda bele bá tanba empregu garantidu tiha ona hanesan iha Austrália no Koreia Súl. Agora seidauk iha kontratu ruma ho ajénsia ne’ebé rekoñesidu,  ha’u hateten kuidadu, kuandu iha dúvida ruma di’ak liu ba ko’alia ho Sekretaria Estadu Formasaun Profisionál no Empregu (SEFOPE) no ajénsia  koñesidu,” nia bolu atensaun.

Xefe Estadu dehan, aktu bosok timor-oan akontese desde tinan 20 liubá no kazu ne’e la’ós foin akontese no la’ós akontese iha Timór de’it maibé mós iha rai barak.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here