Membru Grupu Arte Marsiál iha munisípiu Bobonaro partisipa hela atividade sensibilizasaun segunda diretiva hosi KRAM. Imajen Tatoli/Sérgio da Cruz.

BOBONARO, 23 juñu 2022 (TATOLI) – Komisaun Reguladora Arte Marsiál (KRAM)  koopera ho Polísia Nasionál Timor-Leste, munisípiu Bobonaro, sesta ne’e sensibiliza segunda diretiva ba Grupu Arte Marsiál (GAM) ne’ebé eziste iha munisípiu refere.

Prezidente KRAM, Octavio da Conceiçao, esplika, atividade sensibilizasaun sedunda diretiva ne’e ho objetivu atu introdús matadalan ba arte-marsiál sira kona-ba legalidade hosi Diresaun Servisu Rejistu Notariadu.

Notisia Relevante:Sub-KRAM husu  joven arte-marsiál konstribui ba pás no estabilidade

Segunda diretiva (arahan kedua) ne’e, KRAM haktuir madalan no prosedimentu oin lima mak hanesan; dahuluk kona-bá resensiamentu ba membru organizasaun sira, daruak re-estabelesimentu fatin formasaun, datoluk kona-bá formasaun ba treinadór sira, dahaat kona-bá sansaun no komprimenta sira, ikus liu mak komisaun disiplinár kada organizasaun hotu-hotu.

“Matadalan sira-ne’e sai hanesan regra própriu atubele orienta organizasaun tuir polítika governu nian, atu reintegra ba iha sosiedade no ba modalidade desportiva,” nia informa ba jornalista sira, iha Jináziu Maliana, sesta ne’e.

Biban ne’e, Sekretáriu Autoridade Munisípiu Bobonaro, João Fátima do Carmo, agradese ba KRAM ne’ebé iha inisiativa di’ak hodi halibur arte-marsiál hotu atu la’o tuir enkuandramentu legál no lei ne’ebé vigora iha Timor-Leste.

Nu’udar autoridade sempre koopera ho kualkér inisiativa atu dezenvolve talentu foin sa’e sira-nian nune’e kontribui ba pás no establidade iha munisípiu Bobonaro.

“Ha’u fiar katak maluk sira hotu apár ona ho diretiva ruma no dekretu-lei ne’ebé mak durante ne’e governu fó-sai ona ba ita-boot sira, maibé ne’e hanesan prosesu ‘teste’  ida, ha’u fiar katak imi hotu sei rona malu la’o ho di’ak tuir dekretu-lei ka baze legál ne’ebé iha,” nia espera.

Komandante Operasaun PNTL Munisípiu Bobonaro, Inspetór Xefe Armando Lacu Sila, esplika, maske governu re-integra ona arte-marsiál ba komunidade, maibé tenke kumpre depaixu hotu inklui lei númeru 5/2017 ne’ebé daudaun ne’e sei válidu hela.

“Imi hotu, maske grupu arte-marsias ketak-ketak maibé kooperasaun ba iha seguransa la’ós responsabilidade polísia mesak de’it, maibé iha ita hotu-hotu nia liman, atu lori munisípiu Bobonaro nia naran morin iha munisípiu seluk no Timor laran tomak, ida-ne’e mak ita hotu nia esperansa,” nia fó hanoin.

Membru grupu arte-marsiál ne’ebé partisipa iha atividade ne’e mak hanesan; Persaudaraan Setia Hati Terrate (PSHT), Kmanek Oan Rai Klaran (KORK), Ikatan Kera Sakti (IKS), Tae-Kwon-Do no Karate-Do.

Rezolusaun Governu númeru 4/2020, 2 marsu, ne’ebé revoga tiha rezolusaun númeru 16/2013 hodi fó informasaun ba GAM tolu hanesan,  PSHT),  IKS no KORK bele kumpre regra sira-ne’e.

Arte-marsiál tolu tenke kumpri kritéria 18

  1. Estatutu federasaun/organizasaun ho lian Tetun no Portugés ne’ebé aprova iha asembleia jerál.
  2. Akta kongresu federasaun ka organizasaun
  3. Estatutu Federasaun/Organizasaun, kartaun identidade (BI, Kartaun Eleitorál no dokumentu relevante).
  4. Patrimóniu organizasaun.
  5. Atributu no materiál ne’ebé utiliza hodi prátika arte-marsiál uza durante iha fatin treinu.
  6. Mapa lokalizasaun treinu no fatin eskritóriu.
  7. Fundadór mínimu ema na’in-10 kompleta ho kartaun (BI, Kartaun Eleitorál no dokumentu relevante).
  8. Bom komportamentu treinadór ba sentru, klubu no eskola ne’ebé destinu ba prátika arte marsiál.
  9. Atestadu médiku treinadór nian.
  10. Karta autorizasaun hosi xefe suku no na’in ba rai (ba fatin treinamentu no fatin eskritóriu).
  11. Nível sertifikadu.
  12. Foto treinadór
  13. Totál membru tenke na’in-50 kada sentru, klubu ka eskola.
  14. Baze de dadus hosi membru hotu no nia responsável iha munisípiu 12 no REAO.
  15. Karta afiliasaun husi federasaun/organizasaun internasionál (ba organizasaun ne’ebé mai hosi estranjeiru).
  16. Deklarasaun hosi sentru, klubu ka eskola atu la afilia ba partidu polítika
  17. Deklarasaun laiha konflitu interna no eksterna organizasaun, no
  18. Karta rekomendasaun hosi FESTIL (ba organizasaun ne’ebé hamahon aan iha FESTIL).

Jornalista   : Sergio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here