VIQUEQUE, 26 maiu 2022 (TATOLI)—Prezidente Sub Komisaun Reguladora Arte-Marsiál (KRAM) Viqueque, Cosme Sarmento, husu joven no estudante sira hodi konstribui ba pás no estabilidade, tanba Governu reativa ona atividade arte-marsiál.
“Ha’u husu joven no estudante sira, katak sentidu hosi arte-marsiál ne’e la’ós uza hodi ba baku malu, la’ós uza hodi oho malu ka estraga malu, maibé ita komprende didi’ak liafuan arte tanba liafuan ne’e bahasa indonéziu karik seni, ne’ebé uza hodi defende-an,” Prezidente Sub-KRAM hateten ba Agência Tatoli, bainhira halo diseminasaun dekretu-lei númeru 5/2017 ba estudante sekundáriu 04 setembru, iha postu Viqueque vila, kinta ne’e.
Notísia relevante: Governu ofisialmente halo reabertura ezersísiu arte-marsiál tolu iha Timor-Leste
Responsável Sub-KRAM konsidera, desizaun Governu atu atividade arte-marsiál tanba antes ne’e bainhira akontese krime iha fatin-fatin, ema sempre temi arte-marsiál maka baku malu, entaun Governu kria kondisaun hodi asegura kondisaun.
“Mosu beibeik problema entre arte-marsiál IKS, PSHT no KORK, entaun provizóriu taka organizasun arte-marsiál tolu, maibé liuhosi prosesu naruk to’o agora Governu tau atensaun másimu ba organizasaun hotu-hotu tanba organizasaun sai hanesan arte la’os uza hodi baku malu,” nia akresenta.
Nia konta tuir, iha okupasaun Indonézia, militár indonézia mak lori organizasaun PSHT mai Timór ho objetivu ema ne’ebé tama ona iha organizasaun ne’e sai forsa polítika ba militár indonéziu nian atu sobu polítika Timór.
“Maibé realidade la akontese, militár Indonéziu hanorin timor-oan iha organizasaun PSHT sai aumenta ba beibeik, sai forsa polítika Timór nian ba luta ukun rasik-an, ema ne’ebé hanesan militár Indonéziu forma sai filafali inimigu ba forsa Indonézai nian,” nia konta tuir.
Aleinde ne’e, nia dehan, timor-oan sira ne’ebé bá eskola iha Indonézia maka lori organizasaun IKS mai Timór, ho objetivu halibur malu sai hanesan forsa polítika ida hodi kontra inimigu sira iha Timór. Durante iha tempu rezisténsia nia laran, organizasaun PSHT no IKS ne’e la inimigu ba malu, maibé sira sai hanesan forsa ida iha Timór hodi hasoru militár Indonézia sira.
Maibé Cosme Sarmento nota katak hafoin Timor-Leste hetan ukun-an, membru organizasaun sira baku malu filafali to’o ikus Governu deside taka, maibé Governu inisiativa loke filafali, liuliu organizasaun sira ne’ebé Governu rasik taka agora hetan filafali legalidade bainhira tama ona jornál Repúblika, tanba Govenu rekoñese ona no bele halo implementasaun atividade organizasaun sira.
“Maibé atu implementa atividade organizasaun, KRAM presiza reforsa ho seguransa, liuliu Polísia Nasionál Timor Leste (PNTL), autoridade lokál, xefe suku, xefe aldeia no komunidade tenke hatene tanba lei asegura ona no bele la’o tuir korridór lei nia laran. Ha’u hakarak fó sai regra balun ne’ebé treinadór sira dehan katak iha orientasaun polítika ida maka organizasaun banhira atu rekruta ninia membru, inan-aman tenki hatene no tenke asina deklasaun katak ha’u-nia oan bele tuir treinu, labele uza forsa, lei la fó dalan, no labele husu osan ba membru sira tanba lei maka haruka,” nia dehan.
Nune’e mós, regra ba ema ne’ebé sai treinadór tenki iha sertifikadu, membru másimu na’in-50 no mínimu na’in-25, iha fatin treinu tenki rai-na’in asina deklarasaun, koñesimentu ba autoridade lokál sira, hanoin fó treinu ba membru sira tenki aprezenta mós oras teinu ba KRAM no treinu labele liu oras.
Enkuantu, Sub-KRAM munisípiu Viqueque halo disemisaun ba dekretu-lei númeru 5/2017 ne’ebé hetan partisipa másimu hosi estudante sekundáriu 04 setembru, profesór inklui membru PNTL munisípiu Viqueque.
Jornalista : Vitorino Lopes da Costa
Editora : Julia Chatarina
