Komunidade sira fakar ona rai-henek ho fatuk iha natar área soso, suku Holsa, postu administrativu Maliana, munisípiu Bobonaro. Imajen Tatoli/Sérgio da Cruz.

BOBONARO, 22 juñu 2022 (TATOLI) – Prezidente Autoridade Munisípiu Bobonaro, Ernesto de Oliveira Barreto, preokupa ho komunidade ne’ebé halo fali iha uma natar Maliana.

Prezidente Autoridade Bobonaro ne’e ko’alia ona Ministru Administrasaun Estatál, Miguel Perreira de Carvalho, nune’e bele aselera projetu-lei uzu solu ne’e.

Notísia relevante: Lú Olo triste haree natar Maliana nakonu ho fatuk no rai-henek 

“Importante aselera lei uzu de solu ne’e, atu nune’e bazea ba lei ne’e mak ha’u bele hasai sirkulár ida, ba ema sira-ne’ebé sosa rai atu bandu halo konstrusaun iha natar laran sira-ne’e,” nia informa ba Agência Tatoli, iha eis Kodim, kuarta ne’e.

Prezidente Autoridade ne’e haktuir, durante ne’e autoridade mós sempre preokupa ho problema ne’e no nia rasik uza kompeténsia hatún ona orientasaun bainhira komunidade sira-ne’ebé atu sosa rai tenke hetan koñesimentu hosi lideransa komunitária sira, maibé komunidade sira kontinua halo konstrusaun tanba seidauk iha baze legál.

“Maske lei ne’e seidauk mai, maibé neste momentu sira labele obriga-aan harii, kuandu obriga-aan pasiénsia Polísia tenke tún, tanba ita lebele estraga ema seluk, ezemplu tau pertamina ida iha-ne’ebá depois aban bainrua dezastre ruma, ema sira iha kraik ne’ebá vítima hotu,” nia esplika.

Munisípiu Bobonaro iha poténsia ba setor agrikultura, liuliu  natar tanba tinan-tinan agrikultór sira sempre utiliza halo produsaun, maibé oras ne’e daudaun nia imajen ladún furak no la matak ona husi ema nia haree hanesan bainbain iha tempu udan, tanba komunidade sira komesa fakar ona fatuk no rai henek nakonu liu-liu iha dalan protokolu diresaun Maliana ba kapitál Dili.

Situasaun ne’e mós konsege sai mós prekupasaun nain ulun sira nia, tanba iha loron 15 fulan-dezembru tinan 2021, Fransico Guterres Lu-Olo sei asume kna’ar nu’udar Prezidente Repúblika toka asuntu ne’e bainhira halo diálogu ho komunidade sira iha Jináziu Maliana.

“Maliana produsaun barak la halimar, natar boot, kuandu ha’u liu ba mai rai ne’e buras, maibé hau haree fali nakonu fali rai-henek ho fatuk mak iha natar laran, ha’u la hatene atu halo saida,” nia dehan.

Nune’e mós iha segunda loron 20 fulan-juñu nee, Ministru Administrasaun Estatál, Miguel Perreira de Carvalho, foti kesatun ne’e durante asuene kargu nu’udar Ministru Planu no Ordemanetu Interinu, iha atividade konsulta públika ba reajustamentu Planu Estratéjiku Dezenvolvimentu (PED) 2011-2030 iha eis Kámara Dioseze Maliana.

“Ohin loron ita-boot sira hanesan komunidade sira-nia natar dalaruma tinan ida halo dala-ida de’it, tanba natar sira iha Nunura nian ne’ebá, hau haree komesa uma mak hela iha laran, la’ós hare mak iha laran, maibé ha’u rona prezidente autoridade halo hela esforsu atu trava tiha buat sira-ne’e,” nia hateten.

Agrikultór sira-ne’ebé durante ne’e halo natar iha área ne’e mai hosi suku Holsa, Odomau no suku Tapo-Memo, maibé dependénsia liu ba udan-been, tanba irrigasaun Maliana II durante tinan barak ona la fornese bee ba natar.

Purtantu tuir dadus sensu agríkola munisípiu Bobonaro iha poténsia ba setór agrikultura área kultiva natar maizumenus ektare 7,663.

Tuir dadus CVRS períodu II (1 julu to’o 31 dezembru 2018) Diresaun Estatístika Munisípiu Bobonaro iha aldeia 192, Suku 50, postu administrativu neen, ho totál populasaun 114,537 komposta hosi mane 57,462, feto 57,075 ho totál uma-kain 24,591.

Notísia relevante: CAAKUB planeia sosa hare-kulit hosi grupu agrikultór

Jornalista   : Sérgio da Cruz

Editór         : Evaristo Soares Martins

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here