Prezidente CAAKUB, António Barreto da Conceição. Imajen Tatoli/Sérgio da Cruz.

BOBONARO, 04 Janeiru 2022 (TATOLI) – Sentru Atendimentu Agríkola Kuda Ulun Bobonaro (CAKUB, sigla portugés), planeia tinan ne’e sosa hare-kulit hosi grupu agrikultór 279 iha postu administrativu Maliana Vila, munisípiu Bobonaro.

Prezidente CAKUB, António Barreto da Conceição, informa, grupu agrikultór 279 mai hosi suku Lahomea, Holsa, Odomau, Ritabou no Raifun ne’ebé mak durante ne’e halo natar utiliza irrigasaun Maliana I.

“Ami rejista totál ami-nia membru agrikultór 279 iha Maliana Vila hamutuk grupu 29 mak sai membru CAKUB, ne’e duni planu tinan ne’e ami sei sosa uluk mak agrikultór sira-ne’ebé sai ona membru, maibé la taka dalan mós ba agrikultór sira seluk, karik ami sei iha kbiit atu sosa,” nia informa ba Agência Tatoli, iha Maliana, tersa ne’e.

Nia informa, iha tinan kotuk rezultadu produsaun hare hosi 140 agrikultór sa’e, CAKUB sosa tonelada 132, maibé iha tinan ne’e asosiasaun sosa tonelada hira depende ba rezultadu kolleta.

Purtantu, hare-kulit ne’ebé kada tinan CAKUB sosa hosi grupu agrikultór sira mak hanesan, Sihara, IR 64 Nakroman, ho prosesu normál kada kilograma sentavu $0.45.

“Hare-kulit sira-ne’e, ezemplu bainbain ami dulas tonelada 40, ita hetan de’it rezultadu sai foos tonelada 20 no  tonelada 20 sai fali fós-ikis no hare-uut, depois ami distrubui fali ba komapañia sira fa’an iha loja agrikultór sira, iha Dili no munisípiu,” nia esplika.

Nia afirma, maske tama ona tinan foun, maibé hare-kulit tinan kotuk tonelada 130 ne’ebé sosa, foin halo prosesamentu tonelada 40 no falta tonelada 90 mak sei iha hela armazein, maibé tuir planu antes tama fulan-maiu tinan ne’e, CAAKUB sei konklui prosesamentu nune’e bele simu fali hare-kulit foun.

Hafoin halo prosesamentu ba hare-kulit, distribui ba iha loja agrikultór sira hanesan Meymart Supermekadu, Timor Plaza no seluk tán ho folin kilograma ida $1.10.

Nune’e mós 25 kilograma $26.50,10 kilograma $11 dolar, fós mean no metan kilograma ida $1.50, kilograma 5 ho folin $7.50, enkuantu fós-ikis 25 kilograma $10 no hare-uut kilograma 30 ho folin $5.

Entretantu totál rendimentu lokál ne’ebé CAAKUB hetan durante ne’e hamutuk $31,000.00. Hosi montante ne’e hasai fali rihun $12-resin sosa adubu distribui ba grupu agrikultór sira no sei falta rihun $20-resin mak iha hela banku.

Notisia relevante: CAAKUB sosa hare-kulit tonelada 130 hosi agrikultór Bobonaro

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here