Vise Primeiru-Ministru no Ministra Solidariedade Sosiál no Inkluzaun, Armanda Berta dos Santos, lidera reuniaun Konsellu Ministru, iha Palásiu Governu, kuarta (22/06). Imajen Tatoli/Francisco Sony

DILI, 22 juñu 2022 (TATOLI)–Governu liuhosi reuniaun Konsellu Ministru (KM), kuarta ne’e, delibera atu autoriza selebrasaun akordu kontribuisaun finanseira entre Governu Timor-Leste ho Ajénsia Kooperasaun Internasionál Japoneza (JICA, sigla inglés), kona-ba programa reabilitasaun urjente ba infraestrutura ne’ebé aat kauza hosi inundasaun.

“Kontribuisaun finanseira hosi JICA ne’e ho valór $7.400.000,” Ministru Prezidénsia Konsellu Ministru, Fidelis Manuel Leite Magalhães, relata hafoin ramata reuniaun ezekutivu, iha Palásiu Governu.

Biban ne’e, KM delibera ona atu indika Ministru Finansa, Rui Augusto Gomes, hodi asina akordu ne’e lori Governu Timor-Leste nia naran.

Antes ne’e, ekipa survey hosi JICA iha Timor-Leste aprezenta ona estudu kona-ba rekuperasaun  infraetrutura iha kapitál Dili ba Ministériu Obra Públika (MOP).

Notísia relevante: Ekipa survey JICA aprezenta rezultadu estudu rekuperasaun infraestrutura ba MOP

MOP rasik identifika estragu sira durante dezastre naturál iha loron 04 abril 2021 hamutuk 117 iha teritóriu laran tomak, kompostu hosi estragu simples 40 no estragu komplexu 77, ho estimasaun kustu pur volta millaun $245.

Servisu emerjénsia nível ida kompleta toma konta hosi empreza hamutuk 37, ne’ebé projetu ualu deside halo serbisu normalizasaun voluntariamente, enkuantu seluk ho pagamentu no daudaun finaliza ona. Servisu emerjénsia nível rua hamutuk ualu, balun kompleta, balun ein progresu no seluk iha faze preparasaun.

Estrada Kampung Alor kompleta 100%, ne’ebé projetu haat ninia prosesu iha Ajénsia Dezenvolvimentu Nasionál (ADN), ida Ponte Bekusi iha prosesu preparasaun, ida Cantilever Ponte CPLP tama ona konkursu no ida Ponte Loes tama iha Unidade Jestaun Projetu (PMU, sigla inglés).

Servisu emerjénsia nível tolu hamutuk 17 iha faze investigasaun no preparasaun dezeñu, projetu rua haruka ona ba ADN, ne’ebé projetu 15 mak verifika ona no submete ba Konsellu Administrasaun Fundu Infraestrutura (KAFI), no servisu emerjénsia nível haat sei iha faze planeamentu.

Iha Orsamentu Jerál Estadu (OJE) 2022, Governu prevee orsamentu iha fundu infraestrutura hamutuk millaun $332 ba projetu 700 resin.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here