Reprezentante ekipa survey halo aprezentasaun ba MOP. Imajen/MOP

DILI, 31 maiu 2022 (TATOLI)—Ekipa survey hosi Ajénsia Japaun ba Kooperasaun Internasionál (JICA, sigla ingés) iha Timor-Leste, semana ne’e, aprezenta rezultadu estudu kona-ba rekuperasaun infraestrutura iha kapitál Dili ba Ministériu Obra Públika (MOP).

Aprezentasaun ne’e iha ámbitu semináriu tinan 20 lasu amizade no solidaridade entre Timor-Leste no Japaun, ho tópiku “analiza inundausaun iha área kapitál Dili no planu ba mota Comoro.”

Reprezentante JICA iha Timor-Leste, Goto Ko, hateten, aprezentasaun ne’e foku liubá diskusaun tékniku atu partilla rezultadu analiza inundasaun iha mota Comoro no inundasaun iha área kapitál Dili, ne’ebé bazeia ba rezultadu hosi estudu sientífiku péritu JICA nian ba pós situasaun no levantamentu dadus kona-ba kontramedida inundasaun, ne’ebé hahú ona iha agostu 2021.

“Rezultadu estudu ne’e sei sai hanesan sentru hodi estabelese planu redusaun risku dezastre ba tempu médiu no naruk, inklui asaun ba medida estrutrutura no naun estrutura hodi redús risku dezastre,” Goto Ko relata hanesan haktuir iha nota komunikadu ne’ebé Agência Tatoli asesu, tersa ne’e.

Notísia relevante: JICA sei halo peskiza ba iha planu melloramentu drainajen

Inisiativa ne’e hanesan misaun Governu hamutuk ho parseiru dezenvolvimentu sira atu redús risku dezastre iha futuru no nesesáriu ba MOP atu foti medida estruturál no partikulár.

Daudaun ne’e, JICA hamutuk ho Governu Timor-Leste promove hela konseitu ‘sidade seguru, reziliente no atrativu’ hanesan títulu ne’ebé JICA sujere, ho  konseitu ne’e sei sai pilár ida atu suporta dezenvolvimentu ekonomia Timor-Leste liuhosi kria sidade atrativu hamutuk ho sidade reziliente ba dizastre.

“Ema labele hela ho dame iha sidade ne’ebé afetadu hosi inundasaun iha kualkér tempu inklui investimentu estranjeiru limitadu,” nia dehan.

Nune’e, konseitu sidade ‘sidade seguru, reziliente no atrativu’, hanesan pilár neen, medida kontrola inundasaun, dezenvolvimentu infraestrutura krítiku sira hanesan estrada, ponte, portu, airoportu, ospitál sira, no seluk tan, udan been no sistema observasaun elevasaun ba bee.

Nune’e mós, planu ba sidade labele hela iha fatin ne’ebé ho risku dezastre hanesan hela besik mota, lei no regulamentu ne’ebé apoiu dezenvovimentu sidade no ikus  liu kapasitasaun ba  rekursu umanu.

“Konseitu sira ne’e labele atinje bainhira la hó apoiu hosi Governu Timor-Leste, maibé JICA sei envolve ativamente hamutuk ho parseiru dsezenvolvimentu sira seluk atu atinje konseitu sira,” nia akresenta.

Iha biban hanesan, Ministu Obra Públika, Abel Pires, husu parseiru dezenvolvimentu sira hodi aselera apoiu intervensaun no prevensaun hodi redús inundasaun iha kapitál Dili, atu nune’e kalamidade hanesan loron 04 abril 2021 labele akontese tan.

“Bainhira udan-been ho kuantidade no velosidade a’as ne’e estraga estrada, ponte no seluk tan to’o ohin loron ita halo análiza no halo mitigasaun ba estragu ne’e kuaze millaun $30 resin, daudaun ne’e intervensaun la’o hela, atu nune’e komunidade bele hela ho hakmatek,” nia tenik.

Iha aprezentasaun ne’e, Ministru husu atu halo kompilasaun dadus hosi ekipa survey JICA, hosi Água de Portugál (AdP) liga ho planu mestre ba sistema bee-moos no drenajen iha kapitál Dili, inklui ho Autoridade Nasionál Água no Saneamentu, Institutu Públiku (ANAS, I.P) rasik atu oinsá bele normaliza mota no drenajen sira iha kapitál Dili.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here