Partisipante diskusaun reajustamentu PED 2011-2030 hasai foto hamutuk hafoin halo diskusaun iha salaun munisipál, tersa (21/06). Imajen Tatoli/Vitorino Lopes da Costa

VIQUEQUE, 21 juñu 2022 (TATOLI)–Reprezentante Sosidade Sivil munisípiu Viqueque prefere iha Planu Estratéjiku Dezenvolvimentu (PED) 2011-2030, Governu tau prioridade ba dezenvolvimentu ba área rurál no urbana tanba liga liu asuntu klimátika no dezastre naturál.

“Ami prefere PED 2011-2030 Governu tau prioridade halo dezenvolvimentu ba área rurál no urbana tanba asuntu mudansa klimátika no deazstre naturál. Se bele ita-nia planu estratéjiku ne’e ko’alia mós kona-ba redusaun risku dezastre tanba daudaun ita tau osan  hodi responde ba emerjénsia,” Diretór Care internasionál iha Viqueque, Euclides Hornai, relata ba Agência Tatoli, hafoin ramata diskusaun reajustamentu PED 2011-2030, iha salaun munisipál, tersa ne’e.

Notísia relevante: MAP planeia sosa fini nuu hosi nasaun-tolu hodi lori varidade

Foin lalais bainhira akontese kalamidade iha loron 04 abril mak autoridade sira responde preokupasaun sira ho emerjénsia, maibé laiha planu redusaun risku dezastre ne’ebé integradu.

“Ha’u hanoin ba oin ita tau importánsia ba ida-ne’e, hahú hosi área rurál to’o urbana,” nia akresenta.

Aleinde ne’e, nia husu ba Governu presiza subtitui mina-sona ne’ebé importa hosi nasaun Indonézia tanba daudaun Prezidente Repúblika Indonézia bandu importa mai Timor Lesta.

“Iha Viqueque nuu barak, maibé fábrika laiha. Oinsá maka Governu tau importánsia ba ida-ne’e hodi responde mina tanba ita ne’e tau importánsia tebes ba ita-nia produtu lokál,” nia hato’o.

Iha fatin hanesan, Fundasaun K’nua Haberan Komunidade, Agosto Pinto, dehan, Governu presiza moderniza plantasaun indústria liuliu nuu tuan sira, maibé Governu seidauk hanoin tanba ida-ne’e mós ko’alia ba dezenvolvimentu ekonomia ba futuru.

“Karik bele Governu hahú halo identifikasaun ba nuu tuan sira iha munisípiu Viqueque hodi kuda filafali, nune’e bele fó benifísiu di’ak no kria indústria mina,” nia tenik.

Responde ba preokupasaun ne’e, Ministru Koodernadór Asuntu Ekonómia (MKAE), Joaquim Amaral, hateten atu diversifika ba ekonomia Governu define ona pilár  rua hanesan agrikultura no turizmu, ne’ebé konsidera sai hanesan setór produtivu transforma ekonomia iha Timor Leste.

“Bainhira iha produsaun sa’e, sei redus importasaun. Tanba ne’e, Governu hahú ho projetu planu rekuperasaun ekonomia iha Viqueque, hodi kuda nuu iha Raitahu. Ha’u koordena ho Ministériu Agrikultura no Peska sai hanesan pilotu, ne’ebé daudaun ne’e estudante sira hosi Israel maka tau matan. Karik projetu Raitahu mak susesu ita sei loke tan iha fatin seluk,” Ministru informa.

Jornalista  : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here