Vendedór ida fa’an nuu laloir iha área Tasi-ibun Tasitolu. Imajen TATOLI/António Gonçalves

DILI, 24 november 2021 (TATOLI)—Governu liuhosi Ministériu Agrikultura no Peska (MAP) planeia ona iha tinan oin sei sosa fini nuu hosi nasaun-tolu hanesan Malázia, Tailándia no Indonézia hodi halo revitalizasaun iha rai ektare 100 iha Viqueque no fatin seluk tan.

“Planu ministériu halo revitalizasaun nuu iha Timor-Leste sei lori variedade di’ak hosi nasaun li’ur. Ita hetan ona kontaktu informalmente hosi Sulewesi, Indonézia liuhosi International Coconut Community (ICC) tanba Timor-Leste sai ona membru, maibé planu sosa ne’e muda fali ba tinan 2022 tanba problema COVID-19 no haree ba transporte limitadu,” Diretór Nasionál Agro-Komérsia no Kooperasaun Setór Privadu hosi MAP, Fernando Egidio Amaral, informa ba Agência TATOLI, iha ninia knaar fatin, Comoro, kuarta ne’e.

Notísia relevante: Revitalizasaun nuu iha Viqueque, MAP sosa fini nuu hibrida 10.000 iha Sulawesi

Tuir Diretór ne’e, ba dahuluk sei sosa fini hamutuk 10.000 ho variedade hanesan nuu badak, a’as, maduru (kelapa genjah), íbrida, no nuu pandan, ne’ebé bainhira iha rezultadu di’ak mak sei sosa tan.

“Nuu pandan di’ak tebes tanba iha kualidade been di’ak, ida-ne’e planu ona maibé iha prosesu tanba  hosi nasaun Tailándia rasik iha lei  bandu lori sai nuu,” nia akresenta.

Diretór ne’e dehan, selesaun variedade nuu atu importa la’ós naran foti de’it, maibé sa’e nia huun no hatun hodi haree isin mak foin sosa.

“Tanba kritéria Standard Operational Procedure (SOP) ne’e, bainhira ita ba halo selesaun nuu tenke moris liu tinan 25 ba leten no fuan barak, labele rezistente ba moras no seluk tan, nune’e garante katak bainhira lori mai no kuda karik iha rezultadu di’ak, maibé tanba situasaun ita tenke ba halo observasaun iha nia hun lai,” nia tenik.

Aleinde ne’e, MAP deside ona bainhira sosa nuu, hakarak foku ba hirak ne’ebé iha valór ekonomia a’as, hanesan hun ida maski nia la fuan barak maibé isin mahar no bele prodús mina barak.

Maski nune’e, ministériu hakarak aselera lalais dezenvolvimentu nuu iha Timor-Leste ho varidade oin-oin hosi nasaun li’ur ne’ebé hetan ona akreditasaun.

“Bainhira nuu ne’e to’o, ita sei prepara kuda ba fatin balun ne’ebé ita prepara ona hanesan iha Viqueque no fatin balun mós ita sei distribui ba komunidade ne’ebé hakarak kuda, ne’ebé bainhira ema barak iha ona inisiativa hakarak kuda, maka valór sosa no produsaun sei hasa’e, tanba ne’e depende ba inisiativa komunidade ne’ebé kuda,” nia esklarese.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here