Xefe suku Maluro, Francisco Amaral. Imajen Tatoli/Vitorino Lopes da Costa

VIQUEQUE, 21 juñu 2022 (TATOLI)—Ekipa interministeriál no ekipa task force, tersa ne’e, hahú halo levantamentu rai no propriedade hosi komunidade afetadu ba implementasaun projetu Likifeitu Naturál Gas (LNG) iha Beaço, munisípiu Viqueque.

“Ha’u nu’udar autoridade lokál tenki kontribui ba prosesu identifikasaun no sei serbisu hamutuk ekipa identifikasaun sira. Komunidade afetadu ba projetu LNG Beaço hosi suku rua hanesan Uma Uain Leten iha aldeia rua no suku Maluro iha aldeia tolu ho totál populasaun hamutuk 2.000,”  Xefe suku Maluro, postu adiministrativu Viqueque, Francisco Amaral, informa ba Agência Tatoli, iha ninia knaar fatin.

Notísia relevante: MPM husu komunidade Beaço kolabora ho ekipa levantamentu dadus ba projetu LNG

Maski nune’e, Governu identifika ona fatin foun ba komunidade afetadu sira no parte tékniku kontinua halo identifikasaun hodi hodi asegura fatin.

“Ha’u fiar katak Governu sei kria fatin dignu ba komunidade afetadu projetu LNG Beaço. Komunidade afetadu Beaço prontu entrega rai hodi halo dezenvolvimentu ba nasaun Timor-Leste,” nia akresenta.

Antes ne’e, Ministru Justisa, Tiago Amaral Sarmento, dehan ekipa Terra Propriedade delega ona ekipa hodi hodi halo levantamentu rai.

“Ekipa Terra Propriedade na’in-10 mai sukat rai ne’ebé komunidade afetadu hela, tanba ne’e tenki aproveita di’ak. Tempu badak komunidade afetadu sei muda sai ba fatin foun, nune’e komunidade tenki koopera tanba Estadu hakarak halo di’ak ba ema hotu. Ministériu Justisa prontu nafatin halo tuir lei hakruka hodi halo levantamentu kadastru ba projetu LNG Beaço,” nia hato’o.

Ministériu Petróleu no Minerál (MPM), Timor GAP, E.P, Autoridade Nasionál Petróleu no Minerál (ANPM) no Institutu Petróleu no Jeolojia (IPG, sigla portugés) no ekipa interministeriál kompostu  hosi Ministériu Justisa (MJ), Sekretaria Estadu Terra no Propriedade (SETP), Ministériu Obra Públika (MOP), Ministériu Agrikultura no Peska (MAP), Ministáriu Interiór (MI), Ministériu Planu Ordenamentu (MPO), Ministériu Administrasaun Estatál (MAE), no Sekretaria Estadu Arte no Kultura (SEAK).

Jornalista  : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here