Atividade sensiblizasaun levantamentu rai no propriedade ba projetu LNG Beaço, iha suku Maluro, segunda (20/06). Imajen Tatoli/Vitorino Lopes da Costa

VIQUEQUE, 20 juñu 2022 (TATOLI)-Ministru Petróleu no Minerál (MPM), Victor da Conceição Soares, husu komunidade Beaço, suku Maluro, postu Viqueque vila, kolabora ho ekipa liña ministeriál sira ne’ebé tun halo levantamentu rai no propriedade ba projetu Likifeitu Naturál Gas (LNG) iha Beaço.

“Ha’u husu komunidade Beaço kolabora ho ita-nia ekipa liña ministeriál sira ne’ebé tun halo identifikasaun ba levantamentu rai no propriedade ba projetu LNG Beaço. Hahú aban ekipa hahú halo identifikasaun rai durante semana-rua. Tanba ita iha ona kompromisu eleitóral, katak kualker partidu ne’ebé ukun, ita tenki lori riku-soin mai dezenvolve iha Timor-Leste hodi fó benifísiu boot ba timor-oan sira. Aleinde ne’e, dokumentu sira ne’ebé daudaun Governu no parseiru diskute iha nível polítika depende ba preparativu atu garante kadoras mai”, Ministru hateten iha ninia diskursu durante programa sensibilizasaun no mos identifikasaun rai no propriedade iha suku Maluro, segunda ne’e.

Notísia relevante: Timor-Gap sei halo levantamentu dadus iha zona dezignadu projetu LNG Beaço

Governante ne’e dehan, antes ne’e projetu LNG Beaço liu dezáfiu no diskusaun barak to’o hamosu opsaun atu tau iha Beaço ka Natarbora, maibé ikus mai komunidade, xefe suku, veteranu no juventude deklara-an no halo petisaun hasoru Governu, ne’ebé dirije ba MPM katak povu Beaço disponível entrega ninia fatin ba Estadu hodi halo dezenvolvimentu.

“Ohin ha’u mai iha ne’e la’ós halo diskusaun, tanba diskusaun polítika hotu ona, katak fatin Beaço maka ba LNG. Ita agora halo diskusaun téknika ba ezekusaun polítika ne’ebé ita hotu  deside ona, nune’e agora ita sensibiliza rai no propriedade”, nia realsa.

Autoridade suku Maluro no Timor Gas no Petróleu, Empreza Públika (Timor GAP, E.P) halo  ona esforsu hodi forma ekipa task force lokál ida, fasilita tékniku sira hosi liña ministeriál hodi apoiu serbisu mediasaun, nune’e prosesu identifikasaun propriedade sira bele la’o ho susesu.

“Esperiénsia ida iha Suai no Betano hasoru difikuldade, tanba maluk sira ne’ebé sai benifisiáriu maka sai fali obstákulu. Ha’u hein katak Beaço-oan sira bele serbisu hamutuk ho tékniku sira hodi dezenvolve ita-nia nasaun. Rai buat di’ak ba ita-nia jerasaun sira ne’ebé tuir mai. Bainhira ita agora la halo, jerasaun ne’ebé tuir mai sei sofre”, nia hato’o.

Ministru konsidera, atu hetan moris di’ak kadoras tenke mai Timor-Leste, nune’e hetan osan hodi rai ba jerasaun sira.

“Ita hatene katak fundu mina-rai hosi posu úniku komesa menus. Entaun tentativa ne’ebé ministériu halo iha tinan 2020 to’o agora atu mutiplika no diversifika, buka tan posu alternativu sira iha rai-maran no tasi-laran. Nune’e, iha tinan rua ka tolu ita bele hetan posu alternativu hodi bele fó reseita ba ita-nia Estadu hodi sustenta ita-nia futuru”, nia enkoraja.

Nune’e mós, nia husu parte hotu nia kolaborasaun di’ak hamutuk ho autoridade lokál no komunidade, nune’e identifikasaun propridade rai iha Beaço la’o ho di’ak.

Levantamentu iha rai ektare 574

Prezidente Timor GAP, E.P, António José Loiola de Sousa, hateten ekipa  Timor GAP, E.P no interministeriál sei kontinua halo levantamentu dadus rai no propriedade hamutuk ektare 574 iha suku Maluro,  Beaço.

“Atividade ne’e ita sei fahe ba faze rua, dahuluk sei hala’o loron 22 juñu to’o 05 jullu 2022 no daruak ita sei hala’o iha loron 21 jullu 2022 to’o 03 agostu 2022. Ekipa Timor GAP no interministeriál sei halo publikasaun dadus rai no propriedade iha outubru 2022”, nia dehan.

Objetivu husi sensibilizasaun ne’e atu fornese mekanizmu servisu kona-ba oinsá atu halo levantamentu dadus rai no propriedade iha Beaço ba ekipa inter-ministeriál sira inklui komunidade Beaço ne’ebé afetadu ba projetu Planta LNG.

Komunidade Beaço mós sei selebra asina akta deklarasaun ida kona-ba hili fatin/rai foun ba Nova/Knua Beaço, Makaliku no Kailoibere. Rai/fatin foun refere ne’ebé propoin husi komunidade Beaço sei entrega ba Governu hodi halo estudu no analiza tékniku detalladu molok komunidade sira muda ba fatin refere.

Depoizde sensibilizasaun informasaun, ekipa TIMOR GAP ho inter-ministeriál sei kontinua atividade levantamentu dadus rai no propriedade ± 574 ektares iha Beaço, Suku Maluro.

MPM liuhosi Timor GAP, E.P, Autoridade Nasionál Petróleu no Minerál (ANPM) no Institutu Petróleu no Jeolojia (IPG, sigla portugés) serbisu hamutuk  ho ekipa interministeriál kompostu hosi Ministériu Justisa (MJ), Sekretaria Estadu Terra no Propriedade (SETP), Ministériu Obra Públika (MOP), Ministériu Agrikultura no Peska (MAP), Ministáriu Interiór (MI), Ministériu Planu Ordenamentu (MPO), Ministériu Administrasaun Estatál (MAE), no Sekretaria Estadu Arte no Kultura (SEAK).

Atividade ne’e partisipa hosi Ministru Justisa Tiago Amaral Sarmento, Vise-Ministru Administrasaun Estat Lino de Jesus Torrezão, Brigaderu FALINTIL-Forsa Defeza Timor-Leste (F-FDTL) Sabika Bessi Kulit, Kolonel F-FDTL Manuel Freitas ‘Mau Buti’, entidade relevante hosi nasionál inklui veteranu no komunidade Beaço.

Komunikadu imprensa hosi TIMOR GAP, E.P haktuir governu da-haat liuhosi MPM ho TIMOR GAP, E.P halo ona diálogu ho komunidade Beaço iha dezembru 2021 no iha janeiru 2022 komunidade Beaço ho konsiénsia rasik halo akta deklarasaun entrega rai dezignadu ba Governu hodi harii planta LNG.

Jornalista : Vitorino Lopes da Costa

Editora     : Julia Chatarina 

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here