Aula prezensiál iha Ensinu Báziku Canossa, hafoin MEJD fó sai sirkular hodi reativa fali aula prezensiál iha Dili, segunda (20/09). Imajen Tatoli/António Gonçalves

DILI, 21 juñu 2022 (TATOLI)–Ministériu Edukasaun Juventude no Desportu (MEJD), tersa semana oin sei halo distribuisaun karteira eskolár 20.000 ne’ebé sosa hosi Indonézia ba eskola públiku 48 iha territóriu nasionál.

“Ha’u husu ona bainhira iha prosesu distribuisaun kadeira no meza foun tenke prienxe uluk ba eskola públiku 48 ne’ebé sei falta hela fasilidade, hafoin kuandu kompletu ona maka foin haree ba eskola sira seluk,” Diretór Nasionál Tékniku Vokasionál, Agostu Pereira, informa ba Agência Tatoli, iha edifísiu MEJD Vila verde, tersa ne’e.

Notísia relevante: EBF Lasama Viqueque laiha karteira eskolár ba estudante

Tuir Diretór, eskola sira seluk hanesan eskola privadu durante ne’e hetan apoiu barak hosi parseiru sira maibé presiza haree lai nesesidade eskola públika, hafoin maka sei haree fali eskola privadu sira.

“Ita sei distribui ba sira maibé sira sei la hetan kuantidade barak tanba eskola públika durante ne’e hasoru hela difikuldade boot,” nia akresenta.

Totál eskola ne’ebé tama ona planu atu hetan distribuisaun kadeira no meza foun ne’e hamutuk 600, maibé iha planu mós atu apoiu mobiliáriu sira ne’e iha Eskola Tékniku Vokasionál (TEKVOK) sira mós tuir nia katak kadeira no meza 20.000 ne’ebé sosa hosi Indonézia, tama ona iha Timór no agora daudaun MEJD asegura hela iha eskola TEKVOK Becora.

“Ita asegura ona mobiliáriu sira iha Eskola TEKVOK Becora tanba ita-nia armazen la sufisiente no ita sei halo serimónia distribuisaun iha 28 juñu semana oin,” nia tenik.

MEJD prevee millaun $2 hodi sosa kadeira no meza foun hosi Indonézia no liuhosi prosesu konkursu ne’ebé Komisaun Nasionál Aprovizionamentu (CNA, sigla portugés) mak loke.

“Ikus mai iha empreza internasionál mak sai manán-na’in no prosesu ne’e foti de’it millaun $1,5 no osan restu $400.000 resin hanesan ne’e maka filafali ba kofre Estadu,” nia tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here