Koordenadora Eskola EBF Lasama, Maria Pinto Gomes Guterres. Imajen Tatoli/Vitorino Lopes da Costa

VIQUEQUE, 25 abril 2022 (TATOLI)—Eskola Ensinu Báziku Filiál (EBF) Lasama iha suku Luka, postu Viqueque vila, munisípiu Viqueque laiha karteira eskolár, nune’e estudante sira obrigadu tuur iha rai hodi partisipa aula prezensiál.

“Problema ne’ebé durante ne’e Eskola Ensinu Báziku Filiál enfrenta maka desde harii iha tinan 2015 to’o agora ami laiha kadeira no meza hodi estudante sira uza, ami-nia estudante sira tuur iha rai maka simu matéria hosi profesór sira,” Koordenadora Eskola EBF Lasama, Maria Pinto Gomes Guterres, informa ba Agência Tatoli, iha resintu eskola iha suku Luka, segunda ne’e.

Notísia relevante: Falta karteira eskolár difikulta prosesu aprendizajen iha ESJ Calixa Viqueque

Relasiona ho kestaun ne’e, parte eskola informa ona ba Governu maibé to’o agora seidauk iha resposta.

“Ami esforsu hatama proposta ba parte Governu hodi tau-matan ba ami, maibé proposta sira ne’ebé ami husu tulun ne’e laiha resposta. Tinan barak ona ami laiha kadeira no meza. Kadeira iha ida ka rua de’it iha sala laran, ne’e abitante lokál maka fó ba ami hodi estudante sira uza,” nia akresenta.

Tuir Responsável eskola, daudaun ne’e iha sala tolu maibé laiha haris fatin, tanba ne’e parte eskola husu ministériu kompetente hodi haree kestaun ne’e no rezolve.

“Maski durante ne’e ami laiha fasilidade hodi estudante sira uza, maibé ami fó motivasaun ba estudante sira hodi kontinua estudante, kondisaun mak hanesan ne’e, nune’e estudante sira mós kompriende, maski sira tuur iha rai maibé ho pasiénsia simu matéria,” nia tenik.

Iha biban hanesan, Vise-Ministru Edukasaun Juventude no Desportu (MEJD), António Guterres, vizita direta ba Eskola EBF Lasama hodi haree kondisaun.

“Eskola ne’e presiza Governu nia apoiu, tau Saudozu Lasama ninia naran maibé laiha fasilidade kadeira no meza hodi estudante sira uza,” nia tenik.

Governante ne’e dehan, MEJD sosa ona kadeira 20.000 hosi Indonézia, nune’e bainhira fornesedór sira tama mai Timor Leste, ministériu sei responde preokupasaun eskola.

Tuir dadus, estudante  Eskola EBF Lasama hamutuk 99, kompostu hosi feto 49 no mane 50 inklui profesór hamutuk neen.

Jornalista : Vitorino Lopes da Costa

Editora    : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here