Membru Governu no entidade relevante asiste aprezentasaun relatóriu Expo Dubai, iha salaun MNEK, tersa (21/06). Imajen Tatoli/António Daciparu

DILI, 21 juñu 2022 (TATOLI)–Governu apresia ho timor-oan sira ne’ebé foti inisiativa hodi bá serbisu iha rai-li’ur hanesan Inglatera no Irlándia tanba bele buka osan ajuda ekonomia família.

“Maluk timor-oan sira foti inisiativa hodi bá serbisu iha rai-li’ur ne’e ita apresia tebes tanba muda mentalidade pesoál, hosi baruk-teen sai badinas, nune’e mós aumenta esperiénsia. Ita labele dehan haruka sira ba rai-li’ur ne’e ladi’ak maibé sira mak ajuda inan-aman barak liu, sira haruka osan mai hodi fó eskola sira-nia maluk iha nasaun seluk, ne’e realidade,” Vise-Ministru Turizmu Komérsiu no Indústria, Domingos Lopes Antunes, hateten, iha salaun Ministériu Negósiu Estranjeiru no Kooperasaun (MNEK), iha Praia dos Coqueiros, tersa ne’e.

Notísia relevante: Incanto Group asina akordu traballadór ho ajénsia Jobs Global

Tanba ne’e, Governu estabelese ona Sekretáriu Estadu Komunidade Timor-oan iha rai-li’ur ho objetivu atu tau-matan ba timor-oan sira ne’ebé hela iha rai-li’ur hodi rezolve sira-nia problema.

“Bainhira ita-nia rain seidauk iha kapasidade atu kria empregu, ha’u hanoin liuhosi Expo Dubai ne’ebé foin lalais ita partisipa ne’e ajuda tebes. Ezemplu ida maka Incanto envolve-an tanba haree ba merkadu Árabe ne’e boot tebes, sira-nia merkadu traballu ne’e kompetitivu no seguru. Ha’u hanoin ne’e área rejionál ida deskobre, esplora no halo parseria ho rai Árabe sira aleinde Europa,” nia akresenta.

Iha biban hanesan, Vise-Ministru Negósiu Estranjeiru no Kooperasaun, Julião da Silva, fó hanoin, timor-oan sira bele bá buka serbisu iha rai-li’ur maibé tenki tuir dalan legál, se lae maka hasoru problema mak fó sala fali ba Governu.

“Informasaun daudaun espalla katak timor-oan sira hasoru problema iha Portugál ne’e problema duni tanba ita seidauk asina akordu bilaterál entre país rua, maibé ita obriga-an ba ona, pasaporte Timór bele tama Portugál tanba ita asina akordu kleur ona, bele bá maibé para pasiar, fulan-neen de’it labele liu, la’ós bá serbisu. Kona-ba bá serbisu akordu ne’e foin prosesu diskusaun, ne’ebé foin diskute timor-oan sira sai barak ona, to’o ne’ebá hasoru problema maka dehan Governu la tau-matan, bá de’it ami la hatene hasoru tiha problema maka fó sala,” governante ne’e dehan.

Bazeia ba dadus hosi Sekretariadu Tékniku Administrasaun Eleitorál (STAE) rejista sidadaun Timór iha Inglaterra hamutuk 2.203, Irlanda Norte 1.290, no Portugál hamutuk 856.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here