Diretór Administrasaun no Finansa MEJD, Antoninho Pires. Imajen Tatoli/Egas Cristóvão

DILI, 20 juñu 2022 (TATOLI)–Ministériu Edukasaun Juventude no Desportu (MEJD) prepara ona planu atu rekruta profesór voluntáriu 444 hodi implementa atividade ensinu aprendizajen programa eskola iha uma ba ensinu pré-eskolár no ensinu báziku 1o ano iha Dili.

Diretór Jerál Administrasaun no Finansa, Antoninho Pires, hateten, programa eskola iha uma iha alokasaun orsamentu hamutuk millaun $2,3, ne’ebé prevee ona iha orsamentu retifikativu no hetan ona promulgasaun hosi Prezidente Repúblika.

“Ministériu Edukasaun Juventude no Desportu tenke aselera programa ne’e atubele hahú implementa iha munisípiu Dili. Ita-nia planu bainhira programa eskola iha uma ne’e realiza, sei halo uluk rekrutamentu ba profesór voluntáriu sira iha kada suku. Ita sei rekruta ema na’in-rua hosi kada aldeia hosi aldeia 222 iha munisípiu Dili, ita sei presiza voluntáriu hamutuk na’in-444 hodi reforsa atividade ne’e,” Diretór informa iha ninia knaar fatin, iha Vila verde, segunda e’e.

Notísia relevante: MEJD prevee millaun $2,3 atu realiza programa eskola iha uma

Programa nasionál ne’e sei halo de’it ba labarik ho idade 3 to’o 5, ne’ebé la hetan formasaun pré-eskolár hafoin ba labarik sira hosi tinan 6 to’o 7 ne’ebé la hetan edukasaun iha ensinu báziku 1o ano, enkuantu labarik sira ne’ebé maka antes ne’e hetan ona edukasaun ka tama ona iha eskola formál, laiha direitu atu partisipa iha programa ne’e tanba sira iha ona fatin ne’ebé di’ak.

“Ita-nia alvu ba de’it labarik sira ne’ebé durante ne’e la hetan edukasaun, maibé ba labarik sira ne’ebé hetan ona edukasaun formál labele abandona sira-nia eskola hodi mai partisipa fali iha programa eskola ba uma ne’e, tanba ne’e laiha dalan,” nia akresenta.

Nune’e mós, Prezidente Autoridade munisípiu Dili, Guilhermina Filomena Saldanha, hateten, programa ne’e nu’udar planu di’ak, ne’ebé Governu liuhosi MEJD kria atu loke kampu traballu ba joven sira iha suku no aldeia sira.

Biban ne’e, Diretór husu ba autoridade suku sira iha munisípiu Dili, molok programa ne’e implementa tenke hahú halo daudaun identifikasaun ba labarik sira ne’ebé la eskola, tanba MEJD nia planu kada sentru aprendizajen iha aldeia ba labarik hamutuk 30 to’o 50.

“Ita husu nafatin autoridade suku sira atu iha liña koordenasaun hodi hahú halo ona serbisu identifikasaun ba labarik sira, maibé tenke labarik ne’ebé maka la eskola. Tanba fatin ne’ebé tama ona iha planu maka sede suku, sede aldeia no alternativu seluk maka igreja,” nia tenik.

Iha fain hanesan, Administradór postu Vera Cruz, Manuel Gusmão, sujere Governu presiza haree didi’ak fasilidade atu apoiu programa ne’e, tanba iha fatin balun distánsia entre sede suku, sede aldeia no igreja mós dook hosi komunidade nia hela fatin.

“Suku sira ne’ebé laiha sede aldeia karik, ba futuru bainhira hakarak aluga komunidade nia fatin atu harii sentru bele halo kontratu,” nia salienta.

Programa eskola iha uma ne’e tuir planu sei realiza uluk iha munisípiu Dili nu’udar programa pilotu ida ba fulan-lima, ne’ebé bainhira programa ne’e hatudu rezultadu di’ak maka sei haluan tan ba munisípiu sira seluk.

MEJD rasik hahú ona realiza enkontru ho autoridade suku sira hosi postu administrativu tolu hanesan Na’in-Feto, Vera Cruz no Don Aleixo.

Sei kontinua tan ho postu Cristo Rei no Metinaro atu disamina informasaun to’o baze hodi nune’e bainhira programa ne’e realiza ona iha jullu tinan ne’e, komunidade bele iha ona informasaun.

Jornalista : Tomé Amado   

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here