Diretór Jerál Ensinu Sekundáriu MEJD, Luís Manuel da Costa Fernandes. Imajen Tatoli/Francisco Sony

DILI, 13 juñu 2022 (TATOLI)–Ministériu Edukasaun Juventude no Desportu (MEJD) sei implementa programa pilotajen eskola iha uma ba labarik tinan 5 to’o 7 iha munisípiu Dili, hahú jullu tinan ida ne’e, ho orsamentu retifikativu millaun $2,3 resin.

Diretór Jerál Ensinu Sekundáriu MEJD, Luís Manuel da Costa Fernandes, hateten, Governu iha responsabilidade boot atu buka tuir labarik sira ne’ebé durante ne’e la asesu ba edukasaun pre-eskolár no ensinu báziku hodi fó formasaun ba sira liuhosi programa eskola iha uma.

“Ita sei foku liu ba labarik sira ho idade kiik ne’ebé atu tama ba edukasaun pre-eskolár ho tinan 3 to’o 5 no ensinu báziku hosi tinan 6 to’o 7, iha primeiru ano ensinu báziku primeiru siklu. Ita foku liu ba labarik ne’ebé la eskola hela de’it iha uma.  Tanba ne’e, ita kria programa ne’e atu tulun sira hodi hetan mós edukasaun,” Diretór informa ba Agência Tatoli iha ninia knaar fatin, segunda ne’e.

Notísia relevante: PN submete ona proposta Orsamentu Retifikativu ba PR

Programa eskola ba uma ne’e maski MEJD nian maibé sei halo kooperasaun ho Ministériu Administrasaun Estatál (MAE) inklui Autoridade munisípiu Dili no autoridade suku sira atubele realiza programa ne’e hodi garante implementasaun iha jullu ne’e bele la’o ho di’ak.

“Ita sei forma ekipa ida atu servisu hamutuk ho Autoridade lokál sira, nune’e hafoin enkontru daruak ne’e ramata, sira bele hahú serbisu ona hodi halo identifikasaun ba fatin sira atu programa ne’e realiza iha jullu no labele iha impedimentu ruma,” nia akresenta.

Nune’e mós, Prezidente Autoridade munisípiu Dili, Guilhermina Filomena Saldanha, hateten Governu hanaran programa eskola iha uma ho razaun atu lori edukasaun besik liután ba labarik sira maibé programa ne’e sei implementa ba labarik sira ne’ebé durante ne’e la hetan edukasaun no programa ne’e rasik sei realiza iha sede aldeia sira ne’ebé identifikadu ona.

“Ita tenke implementa lalais ona programa eskola iha uma tanba orsamentu ba programa ne’e aprovadu ona no programa ne’e rasik ita sei implementa ba labarik hosi tinan 5 to’o tinan 7 ne’ebé maka durante ne’e la hetan edukasaun,” nia salienta.

Tanba iha área rurál sira labarik barak ho idade tinan 5 to’o tinan 7 mak la hetan edukasaun, entaun Governu hakarak hala’o programa ne’e atu lori liután eskola besik ba komunidade, ne’ebé programa pilotajen ne’e sei hahú uluk iha munisípiu Dili.

Programa pilotajen eskola iha uma ne’e atu implementa iha munisípiu Dili iha postu administrativu hamutuk lima, suku 37 no aldeia 222.

Tuir informasaun katak programa eskola ba uma ne’e sei realiza iha sede aldeia hamutuk 222 iha Dili.

Jornalista  : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here