Jogadór Madiran FC selebra vitória hamutuk ho adeptu-sira,hafoin simu taxa kampiaun ba kompetisaun jogu futeból sub-23 epóka 2022, ne'ebe organiza hosi Asosiasaun Futebol Bobonaro (AFB). Imajen TATOLI/Sergio da Cruz

BOBONARO, 18 juñu 2022 (TATOLI)—  Klube Madiran FC, sábadu ne’e, susesu sai kampiaun, hafoin halakon ekipa adversáriu Soboa-Ai hosi suku Oe-Leu, postu administrativu Bobonaro, iha kompetisaun jogu finál sub-23 ne’ebé realiza iha kampu futeból Maliana,munisípiu Bobonaro,  ho rezultadu eskore 2-1.

Ho rezultadu ne’e ekipa ho naran estimadu na’in ba “Rotunda Maliana” tan istória iha futeból ne’ebé organiza hosi Asosisaun Futeból Bobonaro tanba iha kompetisaun jogu sub-22 epoka 2021 susesu sai kampiaun no iha epóka ne’e mós susesu sai vensedór.

Iha minutu dahuluk ekipa rua lansa kedas kontra-atake ba malu tuir rítmu jogu ne’ebé haraik hosi treinadór ida-idak. Nune’e ekipa  rua hatudu jogu bonito liuhosi lansa presaun ba malu ho intensaun atu prodús golu ruma  hodi hetan vitória.

Jogu primeira parte la’o minutu balun Soboa-Ai lansa kedas ameasa ba rede adversáriu liuhosi avansadu Artus Soares ‘Also’ (10), maibé  defeze Madrian FC hamrik firme hanesan Rotunda Maliana nia metin ne’ebé book la bá.

Maski hetan ameasa, maibé jogadór Madiran nafatin hatudu jogu bonito,nune’e jogu foin la’o de’it minute rua avansadu Madiran Marcelino ‘Ason’ (9), susesu ezekuta oportunidade brillante hodi lees golu dahuluk tanba defeza Soboa-Ai la konsege satan, nune’e muda rezultadu ba 1-0 .

Ho golu ne’e, Soboa-Ai la lakon vontade no kontinua nafatin hadau bola hosi Madiran nia ain hodi lansa ameasa bebeik,nune’e jogu lao to’o minutu naruk oituan Treiandor Vitórino Gusmõo orienta jogador sira joga kalma hodi hatama golu.

Jogadór Soboa-Ai hahú domina ho tátika jogu ‘Long’, derepente bola liu kois Defeza Madiran FC Ronaldo Amarál ‘Bolo’ (25) hodi hamonu avansadu Artus Soares (10) Iha grande área, tan ne’e árbitru deside fó penalidade.

Nune’e, oportunidade osan mean ne’e jogadór Soboa-Ai, Artus Soares ‘Also’ konsege ezekuta ho susesu iha minutu 20 hodi muda rezultadu empata 1-1.

Ho golu liuhosi penalidade ne’e, la sai barreira ba Madiran FC atu mantein jogu tanba liu de’it minutu tolu, Duarte do Regeo ‘Tompo’ (10) susesu responde fali golu ida liuhosi sutu livre, halo baliza Sobo-Ai ‘Sokon’ haree la hetan hodi muda eskore 2-1. No eskore refere mantein to’o termina jogu primeira parte.

Dolar ba segunda parte, Treinadór Soboa-Ai, Vitorino Gusmão halo mudansa estratéjia hodi jogu kalma halo jogador Selezariu Sequeira (99), sadik halimar Defeza Madiran FC nia-tensaun too iis naruk mak foin suta ba baliza,maibé defeza Madiran FC kompostu hosi ‘Bolo’ (25), Adelino (5)  no Flavio (13) la fo fatin.

Jogu kontinua la’o too minutu 50 ba leten Soboa-ai nafatin domina kampu liuhosi pasa bola ain bá ain ho velosidade lais tanba hakarak halo golu,maibé ekipa jigante nu’udar nain ba Rotunda Maliana la fó fatin ba Soboa-Ai halo golu

Iha minutu ikus-ikus segunda parte Soboa-ai halo esforsu maka’as liuhosi avansadu prinsipál Artur Soares (10) no Ajai (30) hetan oportunidade osan mean barak hodi lansa sutu Guarda rede João ‘Paizo’, maibé salva bola no balu la kona alvu, nune’e too minutu 90 ramata laiha tan golu ida.

Nune’e, vitória bá Madiran FC sai kampiaun iha kompetisaun jogu futeból sub-23 epoka 2022, Sobo-ai tenke simu konsiékuesia hodi okupa segundu lugar. Enkuatu terseiru lugar okupa hosi ekipa Juveníl River Buolubu.

Jogu ne’e lidera hosi árbitru Jefrianos Loy Maya dos Santos ‘jeje Pai’,asistente primeiru Lucaz Feliz, asistente segundu Domingos Vicente  ‘Juragan’ no árbitru suplenete Mateus Marques da Cruz ‘Atau’.

Tanba ne’e, Primeiru lugar ne’e Asosiasaun Futeból Bobonaro atribui  taxa rotativu ho  osan ho valór $500, segundu lugar hetan taxa no osan $300 no terseiru lugar  hetan mós taxa no  osan $250.

Biban ne’e,  komisaun deside mellor markador mak jogadór ida hosi klube São Miguel ho totál golu neen hetan osan $50, mellor Jogador mak médiu Sobo-Ai, Juvito Vicente Soares (23) ho prémiu $50 no mellor ekipa mak Ex-Kodim nu’udar kuartu lugar hetan osan ho montante $50.

FFTL kongratula klube Madarin FC

Hafoin entrega premiu ba manan na’in sira, Prezidente Federasaun Futeból Timor-Leste (FFTL sigla portugés), Fransico Jeronimo, hatoo kongratulasaun  ba vensedór Madiran FC no klube sira ne’ebé durante partisipa iha kompetisaun ne’e.

“Ha’u husu ba imi hotu labele puas ho rezultadu ida ne’e,maibé tenke badinas treinu nafatin atu ba oin hatudu prestasaun di’ak, nune’e bele reprezenta Bobonaro ba joga iha nasionál hodi hamorin munisípiu nia naran,” Prezidente FFTL enkoraja.

Jogu ne’e partisipa direita hosi Prezidente Asosiasaun Futeból Bobonaro, Domingos Gouveia Moniz, Komandante Polísia Bobonaro,Superintendente Antoninho Mauluta,hamutuk ho membru sira BOP,F-FDTL no hetan partisipasaun mÁsimu hosi adeptu klubu rua inklui komundiade Maliana.

Notísia relevante:  Jogu sub-23 iha Maliana, Jalagovi manán mihis Monumentu FC

Jornalista : Sergio da Cruz

Editor      : Florencio Mirandas Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here