Produtu Cesta Bázika faze dahuluk. Imajen Tatoli/Antónia Gusmão.

DILI, 16 juñu 2022 (TATOLI)–Ministériu Turizmu Komérsiu no Indústria (MTKI), sei halo lansamentu ba programa Cesta Bázika faze daruak iha aldeia Baia Leste, suku Comoro, postu administrativu Don Aleixo, munisípiu Dili.

“Totál benefisiáriu hosi aldeia Baia Leste ne’ebé aban sei simu direitu Cesta Bázika hamutuk 1.500 no lansamentu ne’e hahú iha Dili no sei kontinua ba munisípiu 12 inklui Rejiaun Administrativu Espesiál Oé-cusse Ambeno (RAEOA) tuir kalendáriu distribuisaun,” Koordenadora Téknika Cesta Bazika, Florentina Smith, hateten, liuhosi nota ne’ebé Agência Tatoli asesu, kinta ne’e.

Notísia relevante: Cesta Bázika faze daruak millaun $80, CCI-TL husu investe ba setór produtivu

Rezultadu ne’e fó sai hafoin Gabinete Minitériu Koordenadór ba Asuntu Ekonómiku (MKAE) liuhosi Sekretariadu Cesta Bázika halo reuniaun estraordinária iha kuarta (15/06) no aprova ona kalendáriu distribuisaun Cesta Bázika faze daruak.

Iha aprovasaun kalendáriu ne’e, partisipa hosi entidade ministériu implementadór sira hanesan MTKI no Sekretáriu Estadu Kooperativa (SEKoop), ne’ebé ko’alia mós kona-ba mekanizmu monitorizasaun ba distribuisaun iha territóriu Timór laran tomak ho objetivu atu garante akontabilidade iha prosesu distribuisaun, nune’e bele la’o ho di’ak.

Antes ne’e, Governu liuhosi reuniaun Konsellu Ministru (KM) aprova ho alterasaun, medida distribuisaun Cesta Bázika ba família timor-oan sira ne’ebé presiza liu no apoiu operadór ekonómiku lokál bele kria rejime espesiál kona-ba aprovizionamentu, iha ámbitu planu rekuperasaun ekonómika.

Ho Projetu Dekretu-Lei ne’e, Governu hakarak kontinua fó produtu nesesidade dahuluk no garante sustentabilidade família, ne’ebé iha tempu hanesan atu kria kondisaun normalidade ba atividade produtór no operadór ekonómiku nasionál sira tanba prokura menus.

Jornalista  : Arminda Fonseca

Editora       : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here