Prezidente MAEKOM, Rui Castro. Imajen Tatoli/Jogerjo Guterres

DILI, 11 juñu 2022 (TATOLI) – Kámara Komérsiu no Indústria Timor-Leste (CCI-TL, sigla portugés) husu programa Cesta Bázika faze daruak ho montante millaun $80 investe ba setór produtivu nune’e hasa’e produsaun iha rai laran.

“Sé programa ida-ne’e atu hasa’e produsaun, governu tenke investe barak liu iha produtór sira, liga ba ema sira-ne’ebé investe produsaun ne’ebé maka liga ba kooperatva, fó biban atu halo produsaun ne’e mak importante. Ita investe fali ba parte seluk, entaun susar ba ita atu atinje meta ne’ebé ita hakarak,” Vise-Prezidente CCI-TL, Rui Castro, ko’alia iha ámbitu diskusaun meza redonda kona-ba impaktu cesta bázika iha kontestu rekuperasaun ekonómika, ne’ebé hala’o iha Timor Plaza, sábadu ne’e.

Rui Castro levanta kestaun ne’e tanba Governu no Parlamentu Nasionál deside ona implementa Cesta Bázika  ba faze daruak ho montante millaun $80 kompostu hosi millaun $40 prevee ba Sekretaria Estadu Kooperativa (SEKOOP) no millaun $40 ba Ministériu Turizmu, Komérsiu no Indústria (MTKI).

Peskizadór Organizasaun Naun-Governamentál (ONG) Lao Hamutuk, Mariano Fereira, hateten, kontra polítika Governu nian atu implementa tán programa Cesta Bázika faze daruak, tanba situasaun atuál diferente ho tinan 2020 no 2021.

Nune’e nia husu osan ne’ebé maka Parlamentu Nasionál aprova bele investe ba setór sira seluk, atu ajuda ekonomia Timor-Leste bele la’o di’ak liután.

KDA’I (Kdadalak Institute for Public Policy) organiza Diskusaun Meza-Kabuar (Round Table Discussion) ho topiku Impaktu Cesta Bázika iha kontekstu Rekuperasaun Ekonómika. Iha Timor Plaza Dili, sabadu (11/06). Imajen Tatoli/Francisco Sony.

“Ohin ita hamutuk ho Kadalak Institutu Polítika Públika (KDA’I), halo diskusaun ida kona-ba impaktu Cesta Bázika iha kontestu rekuperasaun ekonómika, agora iha 2022 ita tama ba implementasaun Cesta Bázika  ba daruak.  Ne’e kestaun ida, tanba programa ne’e tuir loloos la relavente,” nia hateten.

Lao Hamutuk haree katak implementasaun faze daruak ne’e ladún nesesáriu, tanba situasaun normál ekonómia la’o di’ak, pudia osan boot ne’e koloka ba setór produtivu sira atu nune’e bele hasa’e produsaun,” nia fó hanoin.

Nune’e mós Dirijente Restaurante Dilicious, Cesar Trinito Gaio, husu millaun $80 ne’e di’akliu tau iha BNCTL atu governu uza investe ba empreza kiik no boot sira-ne’ebé afeta hosi impaktu Covid-19.

“Di’akliu osan cesta bázika ita tau iha BNCTL atubele fasilita hodi apoiu formasaun emprezáriu sira nune’e bele halo sira-nia atividade pequena empreza no médiu-empreza sira nune’e sirikulasaun osan bele la’o iha rai-laran no ekonomia bele funsiona fila-fali ho dia’akliu,”nia fó hanoin.

Enkuantu membru KDA’I, Helder Lopes, hateten, implementasaun programa cesta bázika faze daruak ne’e Governu bele implementa.

“Implementasaun programa rekuperasaun ekonómika cesta bázika ne’e governu bele halo maibé evita kontaminasaun polítika,” nia afirma.

Liuhosi diskusaun meza redonda ne’ebé maka parte Kadalak Institutu Polítika Públika (KDA’I) organiza ne’e ho entidade sira seluk hodi buka solusaun ba kestaun rekuperasaun ekonómika ne’ebé liga ba iha implementasaun programa cesta bázika daruak, hodi hamutuk enkamiña hanoin sira-ne’e ba Prezidente Repúblika no  Governu hodi diskute kestaun ne’e.

Jornalista   : Natalino Costa

Editór         : Evaristo Soares Martins   

PUBLISIDADE HUSI MTCIiklan

1 KOMENTÁRIU

  1. Karik atu hahu realiza fali sexta Bazika, Governo presiza fo atensaun ba Fronteira, tamba kompanha barak komesa hatama hahan lokal husi Atambua no Kupang.
    Tamba sexta Bazika moris atu promove produto lokal rai laran nian, laos husi rai liur.

HAKEREK NO HATÁN

Please enter your comment!
Please enter your name here