Ministru Edukasaun, Juventude no Desportu, Armindo Maia. Imajen Tatoli/Francisco Sony

DILI, 15 juñu 2022 (TATOLI)–Ministru Edukasaun Juventude no Desportu (MEJD), Armindo Maia, garate fulan setembru tinan ne’e bele realiza ona prosesu rekrutamentu ba profesór voluntáriu hamutuk 2.000 hodi tulun prosesu ensinu aprendizajen iha eskola sira iha territóriu nasionál.

“Ha’u halo ona aprezentasaun iha enkontru Konsellu Ministru kona-ba prosesu no roteiru atu halo rekrutamentu tuir vaga 2.000 resin ba profesór voluntáriu sira iha fulan-setembru tinan ne’e. Agora hein de’it apresiasaun mak sei haruka filafali ba ministériu hodi halo preparasaun,” Ministru informa ba Agência Tatoli, iha Palásiu Governu, kuarta ne’e.

Notísia relevante: MEJD aprezenta roteiru rekrutamentu profesór iha KM

Tuir planu ka roteiru ne’ebé ministériu iha, hahú juñu ne’e ekipa ministériu halo ona preparasaun manuál kritériu, hafoin tama jullu sei halo selesaun dokumentu no agostu tenke finaliza.

“Bainhira buat hotu la’o di’ak, setembru tinan ne’e bele halo prosesu kontratasaun, maibé kuandu vaga 2.000 resin maka la konsege kobre hotu, problema oituan tanba ida-ne’e mak disponível,” nia akresenta.

Biban ne’e, Ministru toka kona-ba prosesu konstrusaun no reabilitasaun eskola ensinu báziku no ensinu sekundáriu 10 dezembru Comoro, ne’ebé to’o agora labele realiza tanba komunidade sira okupa hela fasilidade eskola.

“Ha’u fó ona orientasaun ba Diretór Servisu Edukasaun munisípiu Dili no Diretór Nasionál Infraestrutura Edukativu atu halo prosesu negosiasaun ho komunidade no ha’u haruka ona sira ba halo negosiasaun ho komunidade ne’ebé okupa eskola 10 dezembru atu rezolve kestaun ne’e atu ita bele aselera dezenvolvimentu iha eskola,” nia tenik.

Maski nune’e, MEJD la prevee osan ba indemnizasaun, tanba orsamentu ne’ebé Governu prepara daudaun bazeia ba programa,.

“Karik sira presiza, bele ba ko’alia fali ho Terra no Propriedade,” nia salienta.

Konstrusaun no reabilitasaun jerál ba eskola 204 iha territóriu nasionál kontinua la’o nafatin, nune’e tuir estimasaun fulan-jullu bele atinje ona 50%.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here