Prezidente Komisaun G PN, António Verdial. Imajen Tatoli/Antonio Gonçalves

DILI, 15 juñu 2022 (TATOLI)—Komisaun G trata asuntu Edukasaun, Juventude, Kultura no Sidadania iha Parlamentu Nasionál, aprova ona relatóriu paresér ba projetu-lei númeru 41/V(4a)-Kódigu Direitu Autór.

Notísia Relevante: Komisaun G konvida entidade relevante diskute projetu-lei kódigu direitu autór

“Ohin loron, Komisaun G aprova relatóriu paresér projetu-lei Kódigu Direitu Autór ne’ebé preparadu hela no lorokraik ne’e submete kedas ba meza Parlamentu Nasionál hodi tau ba ajenda diskusaun iha plenária faze jeneralidade,” Prezidente Komisaun G, António Verdiál de Sousa, hateten ba jornalista sira iha resintu Parlamentu Nasionál, kuarta ne’e.

Aprovasaun relatóriu paresér projetu-lei ne’e prenxe rekezitu formál, konstituisionál no rejimentál, hodi submete ba meza plenária mak sei deside ajenda diskusaun tuir mai, tanba projetu-lei ne’e importante tebes hodi fó protesaun ba artista Timór-oan, artistika sientífika.

“Konteúdu hosi lei Komisaun G hatama projetu-lei ne’e ho hanoin ida atu oferese posibilidade hodi hadi’a vida artístika no produtór hosi obra orijinál iha Timor-Leste, nune’e bele garante hadi’a kondisaun tomak vida umana hodi hasoru rendimentu ne’ebé boot ba timor-oan tomak,” nia dehan.

Komisaun mós halo ona audénsia públika ho entidade relevante hanesan Ministéiru Ensinu Superiór Siensia no Kultura (MESSK), Sekretária Arte no Kultura (SEAK), Ministéitu Justisa, Ministéiru Turizmu, Ministéiru Públiku, Assosiasaun Advogadu, UNTL, Almamor hodi hato’o sira-nia hanoin kona-ba projetu-lei refere ne’ebé inisia hosi Deputadu sira.

“Apresiasaun hosi entidade relevante nian pertinente tebes, di’ak ba komisaun G no hanoin hotu ne’ebé sira hato’o aseita ho lei ne’e,” nia dehan.

Enkuantu, projetu-lei númeru 41/V(4a)-Kódigu Direitu Autór ne’e, iha artigu hamutuk 224.

Jornalista : Nelson de Sousa

Editór      : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here