Komisaun G halo audiénsia públika ho entidade relevante kona-ba esbosu projetu-lei kódigu direitu autór, iha sala Komisaun G, Paelamentu Nasionál, kinta (09/06). Imajen Tatoli/Tomé Amado

DILI, 09 juñu 2022 (TATOLI)–Komisaun G Parlamentu Nasionál (PN) ne’ebé trata asuntu Edukasaun, Kultura, Juventude, Desportu no Sidadania, kinta ne’e, konvida entidade relevante halo audiénsia públika kona-ba projetu-lei kódigu direitu autór (hak cipta ka hak paten)

Entidade ne’ebé partisipa iha diskusaun mak hanesan Gabinete Sosiedade Sivil Gabinete Primeiru-Ministru, Universidade Nasionál Timor-Lorosa’e (UNTL), ALMAMOR, no United Nations Educational, Scientific and Cultural Organization (UNESCO).

Prezidente Komisaun G, António Verdiál, hateten, objetivu hamosu esbosu lei ne’e atu proteje autór sira ne’ebé hakarak prodús buat ida liuhosi sira-nia matenek no projetu-lei ne’e rasik Komisaun G mak sai inisiadór.

“Direitu autór tenke sai hanesan dokumentu legál ida hodi fó protesaun ba artista hosi área hotu-hotu hanesan múzika, dansa, sinema, literária, no seluk tan, tanba diversidade artista iha nasaun ne’e ninia evolusaun kada loron aumenta ba beibeik,” Deputadu Bankada KHUNTO informa iha resintu PN, hafoin ramata audiénsia públika.

Notísia relevante: Bankada FRETILIN husu reabertura projetu-lei direitu ba autór

Aleinde ne’e, Komisaun G atu inisia fali projetu-lei ne’e atubele proteje artista timor-oan sira-nia direitu no defende propriedade.  

Komisaun G tuir ninia mandatu rejimentál hateten, iha loron-30 hafoin aprezenta projetu-lei iha audiénsia públika, tenke aprezenta filafali relatóriu paresér ba meza Prezidente Parlamentu Nasionál hodi bele debate iha faze jeneralidade, tanba audiénsia ne’ebé halo ho entidade relevante sira konklui ona.

Iha fatin hanesan, Reitór UNTL, João Soares Martins, hateten, prezensa entidade relevante sira hodi fó apresiasaun no iha biban hanesan parte universidade hato’o asuntu importante balun kona-ba direitu patente ne’ebé presiza hetan esplikasaun klaru inklui durasaun ba direitu ne’e rasik.

Tuir João Soares, tanba iha projetu-lei ne’e ko’alia jerál de’it kona-ba durasaun ba tempu, ne’ebé hateten sei kaduka ba tinan-70, entaun tenke konsidera durasaun ba direitu ne’e atu aplika ba saida de’it.

“Tanba iha área sientífiku ba investigasaun nian, autór livru no peskizadór sira bele to’o tinan-100 mós ema sei sita nafatin sira ne’ebé laiha kaduka. Entaun ninia aplikasaun labele jeneraliza ba buat hotu, maibé tenke haree kazu ba kazu. Tanba atu ko’alia kona-ba direitu autór (propriedade intelektuál) tenke define klaru atu labele prejudika fali ba buat seluk,” nia fó hanoin.

Nune’e, mós, Prezidente ALMAMOR, Henrique do Rosário, konsidera, kontiúdu projetu-lei ne’e rasik ko’alia kona-ba kódigu direitu ba obra autór ida nian, atu ema seluk labele viola.

“Lei ne’e sei fó motivasaun ba artista sira atu sira-nia obra ema sei valoriza liuhosi lei ida-ne’e,” nia dehan.

Tuir Henrique do Rosário, bainhira lei ne’e vigora ona mak ema sei la foti arbiru tan direitu obra hosi autór sira inklui múzika sira.

Notísia relevante: “Kódigu direitu autór” ba autór no artista timoroan-sira

“Tanba bainhira ema seluk hakarak kanta autór ida nia múzika tenke husu lisensa, ne’ebé lei ne’e pertinente tebes, fiar katak sei hetan aprovasaun iha Parlamentu Nasionál,” nia otimista.

Projetu-lei ne’e hamosu dezde kedan lejizlatura dahuluk, maibé la konsege pasa iha momentu ne’ebá no tama fali ba lejizlatura dahaat mós la konsege, hafoin lejizlatura dalimak mak hahú filafali serbisu ne’e hodi hein sujestaun no rekomendasaun hosi entidade relevante, nune’e bele akomoda esbosu lei ne’e tuir tempu bele hetan aprovasaun.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here