Ámbitu MAE halo kapasitasaun ba autoridade munisípiu Viqueque, iha salaun munisípiu Viqueque, segunda (13/06). Imajen Tatoli/Vitorino Lopes da Costa

VIQUEQUE, 13 juñu 2022 (TATOLI)–Ministériu Administrasaun Estatál (MAE) liuhosi Diresaun Jerál Administrasaun Finansa, segunda ne’e, fó asistensia téknika ba autoridade munisípiu Viqueque kona-ba planeamentu, aprovizionamentu rezultadu dezempeñu no progresu ezekusaun Orsamentu Jerál Estadu (OJE) 2022.

“Ami mai fó asisténsia téknika ba autoridade sira, diretór liña ministeriál no xefe departamentu sira iha munisípiu Viqueque, atu kapasita sira oinsá atu elabora planu ba tinan 2023 no mós  ba relatóriu ezekusaun OJE 2022 ba  trimestrál dahuluk nian,” Diretora Nasionál  Planeamentu no Avaliasaun hosi MAE, Olavia Marques, hateten Agência Tatoli, iha salaun munisípiu Viqueque, segunda ne’e.

Iha relatóriu ezekuasaun OJE 2022 munisípiu Viqueque ba trimestre dahuluk to’o iha loron 10 juñu atinje ona 30% hosi orsamentu millaun $4.

“Hosi kapasitasaun ne’e, ita-nia tarjetu hakarak munisípiu sira ezekuta sira-nia programa, atividade no orsamentu bazeia ba indikadór inklui meta planu asaun anuál tinan 2022 ne’ebé sira planeia ona. Ida-ne’e maka ita-nia esperansa,” nia tenik.

Notísia relevante: MAE sei aprezenta proposta-lei eleisaun parlamentár ba Konsellu Ministru

Nia dehan, MAE hakarak haree liu ba persentajen orsamentu ne’ebé sei menus, entaun liuhosi  asisténsia téknika ida-ne’e atu ajuda sira hodi mellora di’ak liután relatóriu no implementa indikadór dezempeñu no ezekusaun orsamentu.

Atividade ne’e, realiza durante loron-rua, hahú loron 13 to’o 15 juñu, ne’ebé hetan partisipasaun hosi administradór munisípiu Viqueque, Januario Soares ‘Bolly’, Administradór postu, Diretór munisipál no Xefe departamentu sira ne’ebé serbisu iha administrasaun munisípiu Viqueque.

Jornalista  : Vitorino Lopes da Costa

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here