DILI, 10 junu 2022 (TATOLI)—Diretór Ezekutivu Centro Nacional Chega (CNC), Hugo Maria Fernandes, informa estabelesimentu sentru arkivu istóriku, CNC hein dezeñu finál hosi empreza, nune’e fulan oin CNC bele hahú ona loke konkursu.
Notísia Relevante: CNC realiza semináriu importánsia arkivu istóriku ba estudante UNPAZ
“Prosesu hari sentru arkuivu istóriku, CNC hein hela dezeñu finál hosi kompaña submete iha fulan ne’e nia rohan, nune’e iha fulan oin ita loke konkursu,” Hugo Maria Fernandes hateten ba Agência Tatoli, iha nia knar fatin, Balíde, sesta ne’e.
Nia esplika, sentru ne’e ho naran sentru arkivu, sasán sira-ne’ebé atu tau iha laran kona-ba arkivu istóriku ne’ebé daudaun ne’e CNC rai hela iha Antigu Komarka Balíde.
“Ita-nia fatin ida agora la seguru, tanba la prenxe padraun internasionál kona-ba arkivu nian. Aleinde ne’e, fatin ida agora, uza sela ida iha komarka Balíde nia kondisaun fíziku la prenxe kritéria nu’udar sentru ba arkivu, tanba ne’e ita harii foun, nune’e bele rai akivu sira ho seguru liu,” nia dehan.
Empreza ne’ebé daudaun ne’e halo hela dezeña ba modelu sentru arkivu istóriku foun ne’e mak empreza Niceles, Lda.
Notísia Relevante: CNC sei harii sentru arkivu istóriku
Jornalista : Nelia Fernandes
Editór : Cancio Ximenes
