CNC halao semináriu kona-ba arkivu ba estudante Universidade da Paz. Imajen/Mídia CNC.

DILI, 29 abríl 2022 (TATOLI)—Diretór Ezekutivu Centro Nacional Chega (CNC), Hugo Maria Fernandes, hateten semináriu kona-ba arkivu ne’e atu hasa’e estudante sira-nia koñesimentu kona-ba importánsia hosi arkivu istóriku ba iha dezenvolvimentu peskiza iha Timor-Leste.

Hugo Maria Fernandes hatutan, CNC hala’o semináriu ne’e ba estudante sira atu aban bainrua sira interrese atu asesu ba arkivu Centro Chega, sira bele hatene ona saida mak iha ne’ebá, arkivu iha formatu saida de’it no oinsá mak sira bele asesu.

“Ohin, ha’u fó kona-ba importánsia hosi arkivu ba implementasaun mekanizmu justisa tranzitóriu. Hanesan ita hatene, mekanizmu justisa tranzitóriu iha pilár boot haat. Atu implementa pilar boot haat ne’e aspeitu importante mak iha arkivu sira-ne’ebá mak bele apoia CNC no mós apoiu Governu ba implementasaun pilar sira ne’e,” Hugo Maria Fernandes hateten ba Agência Tatoli, iha salaun Universidade da Paz (UNPAZ), hafoin hala’o semináriu ho tema “A Importância do Arquivo Históriku do Centro Chega! para o desenvolvimento da pesquisa Académica”, iha Ai-mutin, Dili, sesta ne’e.

Iha semináriu ne’e, estudante UNPAZ sira partisipa másimu hodi hato’o pergunta sira ne’ebé kritiku.

Vice-Reitór Asuntu Kooperasaun Externa no Interna iha Universidade da Paz (UNPAZ), Luís Pereira Cardoso, hateten UNPAZ ho Centro Nasionál Chega halo ona kooperasaun iha 2019 no halo ona atividade peskiza ‘Suku Ida Istória Ida’, peskiza istória pesoál, haruka estudante sira ba partisipa tour ne’ebé CNC halo hodi haree ba sítiu istóriku ne’ebé akontese iha fatin pasadu.

Semináriu ne’e foka liubá arkivu Centro Nasionál Chega no objetivu hosi semináriu ne’e atu hasa’e liután estudante sira-nia koñesimentu kona-ba arkivu. 

CNC halao semináriu kona-ba arkivu ba estudante Universidade da Paz. Imajen/Mídia CNC.

“Tanba, iha akontesimentu barak ne’ebé akontese durante períodu rezisténsia nia laran maibé ita seidauk haree didi’ak oinsá atu halo arkivu ba data sira-ne’e. Tanba iha ema balun uluk iha nia karta liberdade hosi prizineriu sira iha kadeia no iha karta wajib lapór balun iha tempu uluk. Sasán sira-ne’e ita presiza atu haree no rai didi’ak fali, nune’e ita bele dezenvolve fali iha Centro Nasionál Chega, atu nune’e jerasaun tuir mai bele asesu,” nia dehan.

Se timor-oan la halo arkivu signifika katak timor-oan labele halo peskiza ba fatin no istória sira-ne’ebé iha tempu pasadu akontese no taka ba jerasaun foun sira atu hatene kle’an kona-ba saida mak akontese iha pasadu, liu-liu iha 1975 to’o 1999.

Estudante Fakuldade Siénsia Sosiais no Humanas, Departamentu Polítika Dezenvolvimentu, Idalia Boavida, hateten semináriu ne’e importante tebes tanba hanesan timor-oan no foinsa’e ida presiza hetan informasaun sira relasiona ho Centro Nasionál Chega nia ezisténsia halo hela iha territóriu laran, ne’ebé atu bele hatene tuir istória iha pasadu hahú hosi 1974 to’o 1999.

“Hanesan jerasaun foun, ita presiza hatene informasaun sira-ne’e tanba nia importante ba ita-nia an. Nune’e ho informasaun ne’ebé ha’u hetan ona, ba oin ha’u sei implementa fila-fali iha ami-nia moris tomak. Aleinde ne’e ha’u sei fahe fali ba kolega sira-ne’ebé seida’uk hetan,” nia dehan.

Entretantu, semináriu ne’e hala’o iha salaun Universidade da Páz ho totál partisipante hamutuk 134.

Jornalista : Nelia Fernandes

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here