Diretór Ezekutivu Servisu Autonomu Medikamentu no Ekipamentu Saúde (SAMES), Santana Martins. Imajen Tatoli/Francisco Sony

DILI, 09 Juñu 2022 (TATOLI)– Diretór Ezekutivu Servisu Autónomu Medikamentu no  Ekipamentu Saúde (SAMES), Santana Martins, husu ba fasilidade saúde liuliu postu saúde no sentru saúde sira ne’ebé presiza estoke aimoruk atubele hato’o pedidu hodi distribui amoruk tanba estoke iha armzein disponivel hela.

“Aimoruk ba inan isin-rua hanesan Ferrous Sulfate ou Folic Acid nomós hanesan aimoruk metildopa no aimoruk nutrisaun ba inan fó susu sira inklui aimoruk esensiál seluk daudaun  estoke disponivél atu halo distribuisaun hodi atende pasiente sira liuliu inan-isin rua sira” Diretór Ezekutivu SAMES ne’e hateten ba Agência TATOLI iha Hotel Timór,  kinta ne’e.

Notísia relevante:  Estoke aimoruk esensiál iha armazein HNGV hahú menus

Atu halo distribuisaun aimoruk, Responsavél ne’e husu ba fasilidade saúde iha territóriu nasionál atu hato’o pedidu hodi fasilita halo distribuisaun.

Iha loron 6 juñu, aimoruk superseriál no esensiál sira seluk tama iha Timor-Leste no tuir planu kontentór hamutuk 28-resin, maibé daudaun kontentór 16 mak tama, falta kontetór 12.

“SAMES mós laiha espasu ina ne’ebé atu rai balun ba iha Sentru Lojístika Nasionál (CLN) iha Baucau ne’ebé ita nia-armazein iha ne’ebá no kontentór hamutuk 12 mak sei mai tan iha fulan ida ne’e nia laran,” nia afirma.

Nune’e, SAMES mós komunika ona ba munisípiu sira liuliu sentru saúde sira ne’ebé estoke medikamentu  menus ona, bele hatoo pedidu  distribuisaun atu bele prosesa lalais no distribui hodi fó atendimentu di’ak ba sidadaun sira.

“Haree aimoruk menus tenke halo pedidu mai lalais tanba estoke ai-moruk iha armazein SAMES nasionál sufisiente atu distribui,” Diretór Ezekutivu ne’e akresenta.

Planu VIII Governu Konstitusionál mak sidadaun hotu iha direitu ba saúde no asisténsia médika ho sanitária no mós iha devér atu defende no promove saúde. Tuir Konstituisaun Repúblika, Estadu tenke promove kriasaun servisu nasionál ida kona-ba saúde universál, jerál ho gratuitu (ka la selu).

Nune’e Governu sei kontinua implementa Polítika Nasionál kona-ba Saúde ho Planu Estratéjiku Nasional Saúde iha setór saúde 2011-2030 (PENSS 2011-2030), hodi mantein vizaun kona-ba “Timor-Leste saudável”, ne’ebé timoroan hotu-hotu bele iha asesu ba saúde.

Hosi programa sira ne’e ho objetivu jerál mak Governu kontinua asegura funsionamentu ne’ebé di’ak, liuhusi Servisu Autónomu Medikamentu no Ekipamentu Saúde (SAMES, I.P), no Laboratóriu Nasional Saúde nian atu bele garante disponibilidade no distribuisaun ai-moruk, reajente no konsumíveis médiku (utensílius médikus) ho efisiénsia, lalais no ho kualidade.

Notísia relevante: Estoke aimoruk iha armazein sentru saúde Manufahi hahú menus

Jornalista : Felicidade Ximenes

Editór        : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here