Diretór Klínika Hospitál Nasionál Guido Valadares (HNGV), Marcelino Correia, imajen TATOLI/ Felicidade Ximenes.

DILI, 26 maiu 2022 (TATOLI)— Diretór Klíniku Hospitál Nasionál Guido Valadares (HNGV), Marcelino Correia, informa daudaun estoke aimoruk esensiál iha armazein hahú menus, nune’e hato’o ona pedidu ba Servisu Autónomu Medikamentu no Ekipamentu Saúde (SAMES) hodi halo distribuisaun.  

“Ita-nia stock out hamutuk item 200-resin mak laiha ona  liuliu item esensiál sira hanesan aimoruk hipertensaun, aimoruk ba inan isin rua tanba ne’e ita halo ona pedidu ba iha Servisu Autónomu Medikamentu no Ekipamentu Saúde (SAMES) atu responde preokupasaun ita-nia tanba aimoruk laiha afeta ba pasiente sira ne’ebé mak halo tratamentu saúde iha iha HNGV,” Diretór Klíniku Marcelino, hateten ba Agência TATOLI iha knaar fatin Bidau, kinta ne’e.

HNGV halo ona pedidu ba iha SAMES no dadaun ne’e halo ona verifikasaun, maibé SAMES rasik mós informa mai dehan stock out iha pedidu ne’e laiha, nune’e hahú loke aprovizionamentu atu halo kompara.

Tanba, Nia dehan estoke aimoruk laiha, mak médiku sira halo atendimentu saúde ba pasiente sira obrigatóriu tenke halo reseita ba pasiente atu sosa aimoruk iha farmasia privadu sira.

“Ita laiha desizaun atu haruka pasiente sira ba sosa aimoruk iha li’ur, maibé akontese ona katak mediku balun haruka pasiente sosa aimoruk tanba estoke laiba. Maibé kuandu estoke iha mak médiku halo reseita ba sosa iha li’ur ne’e bandu no permite,” nia afirma.

Iha fatin ketak, Xefe Departamentu Armazein Sentrál SAMES, Ismenia Mateus da Costa Belo, informa, pedidu HNGV kona-ba stock out ne’e aimoruk prinsipál, ne’ebé iha armazein SAMES nasionál mós laiha ona, nune’e ita loke ona aprovizionamentu atu sosa.

“Ami hahú halo ona prosesu aprovizionamentu no aimoruk hahú sosa ona, nune’e fulan oin aimoruk sira ne’e too iha ita-nia rain, hanesan aimoruk Diazepane Injection 10mg/ml, Amp/2ml no Phenobarbital sodium 100mg,” nia afirma.

Daudaun estoke aimoruk iha armazein nasionál sei disponivél hamutuk item 251 ka 82% no aimoruk ne’ebé mak laiha hamutuk item 56 ka 18%.

Estoke aimoruk ho item  18 % laiha mak hanesan ne’e aimoruk prinsipál  ne’ebé mak hanesan  Amitriptyline  HCL 25mg tabs, Chlorpromazine HCL double scored 100mg tabs, Clindamycin  Phosphate Injection  150mg/ml Amp/2ml,  diazepam Injection  10mg/ml Amp/2ml, Fluconazole 200mg, Fluphenazine  Dec anote Injection  25mg/ml/ Amp/1ml, Glibenclamide  5mg tabs, Griseofulvin scored 259mg tabs, Hydralazine HCL powder for Injection 20mg, Misoprostol scored 200mcg tabs, Omeprazole 20mg tabs, Phenobarbital sodium  100 mg, Therapeutic Milk f100 sachet/114gm, Therapeutic Milk F75 sachet/102.5gm Vitamin B6 (pyridoxine HCL ) 50mg tabs, Vitamin  K1 (Phytomenadione ) Injection  Adult  10mg/ml Amp/1ml or5ml, vitamin K1 (Phytomenadone ) Injection  Paediatric 1mg/1ml Amp/1ml.

Notísia relevante:  Estoke aimoruk no reajente iha armazein SAMES hahú menus

Jornalista : Felicidade Ximenes

Editíór      : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here