Reitór Universidade Nasionál Timor-Lorosa’e (UNTL), João Soares Martins. Imajen Tatoli/Francisco Sony

DILI, 09 juñu 2022 (TATOLI)—Reitór Universidade Nasionál Timor-Lorosa’e (UNTL), João Soares Martins, agradese ba asaun pasífika estudante Fakuldade Edukasaun Arte Umanidade (FEAH, sigla portugés) no Fakuldade Siénsia Sosiál (FSS) hasoru estrutura universidade hodi eziji sira-nia direitu, iha loron 08 juñu.

“Iha pontu ida ha’u agradese ba estudante sira-nia asaun protesta tanba bele fanu Governu, liu-liu Ministériu Ensinu Superiór Siénsia no Kultura (MESSK) no Parlamentu Nasionál (PN) atu loke matan hodi tau duni osan hadi’a infraestrutura iha universidade públika ne’e,” Reitór hateten iha resintu PN, kinta ne’e.

Maski nune’e, parte estutura universidade hasoru ona estudante sira no esplika ona, nune’e parte estrutura fiar katak asaun ne’e sei lori solusaun di’ak iha futuru.

“Husu ba futuru labele halo tan asaun ho maneira hanesan ne’e tanba ladún di’ak. Ita loke ona prosesu konkursu atu hadi’a hodi hein prosesu tuir mai, bainhira tama tinan 2023 maka Governu tau tan orasamentu hodi ita sei hadi’a tan edifisiu foun,” nia tenik.

Notísia relevante: Estudante UNTL halo asaun pasífika hasoru estrutura universidade

Tuir Reitór, loloos parte estudante sira tenke hato’o uluk karta eskrita ka marka audiénsia ho parte estrutura universidade, bainhira laiha solusaun ka universidade lakohi rezolve maka estudante sira halo asaun.

Aleinde ne’e, liga ho númeru estudante sira ne’ebé maka engresu kada tinan, hosi universidade propoin númeru ida maibé hosi MESSK hatún númeru seluk.

“Ezemplu iha tinan 2022, proposta ne’ebé aprovadu iha Konsellu Jerál UNTL propoin estudante 3.335 mak sei tama UNTL, maibé hosi rezultadu estudante admitidu ne’ebé tama mai hamutuk 6.007, ho ida-ne’e maka hahú difikulta situasaun tanba ho rekursu sala aula menus, oinsá universidade buka ajusta atu estudante sira labele lakon sira-nia direitu,” nia akresenta.

Ho nune’e, Reitór universidade públika ne’e konsidera asaun protesta ne’ebé maka estudante sira halo ne’e vale tebes atu ezije atensaun la’ós de’it UNTL, maibé MESSK no PN, nune’e bainhira atu aprova orsamentu karik tenke haree situasaun reál ne’ebé akontese.

“Fiar iha tinan fiskál 2023 bele hetan tan apoiu orsamentu adekuadu hosi Governu atu hadi’a tan edifísiu no sala aula foun. Daudaun ne’e UNTL halo esforsu atu halo reabilitasaun ba kanalizasaun iha FSS tanba sira-nia kondisaun kuandu udan-boot difikulta estudante sira labele simu matéria,” nia dehan.

Antes ne’e, kada estudante hamutuk 2.089 hosi FEAH tinan akadémiku 2021 halo rejistrasaun ho osan $87 no osan ba manuál orientasaun $4, maibé manuál orientasaun la hetan iha tempu orientasaun, hafoin tempu orientasaun ramata no liu loron hirak mak foin hetan, tanba ne’e estudante sira ezije atu devolve sira-nia direitu.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here