Estudante FEAH no FSS UNTL halo asaun pasífika hasoru estrutura UNTL hodi eziji sira-nia direitu, iha edifísiu sentrál UNTL, kuarta (08/06). Imajen Tatoli/Francisco Sony

DILI, 08 juñu 2022 (TATOLI)–Estudante Universidade Nasionál Timor Lorosa’e (UNTL) halo asaun pasífika, kuarta ne’e, iha kampus sentrál hasoru estrutura universidade hodi eziji sira-nia direitu.

Estudante ne’ebé halo asaun ne’e hosi Fakuldade Edukasaun Arte Umanidade (FEAH, sigla portugés) no Fakuldade Siénsia Sosiál (FSS).

Estudante FEAH no FSS UNTL halo asaun pasífika hasoru estrutura UNTL hodi eziji sira-nia direitu, iha edifísiu sentrál UNTL, kuarta (08/06). Imajen Tatoli/Francisco Sony

Senadu Fakuldade Siénsia Sosiál, António dos Santos Loco, hateten, asaun pasífika ne’e estudante sira halo bazeia ba karta sirkulár ne’ebé maka FEAH hasa’e hodi halo aprosimasaun ho universidade, maibé FSS ninia partisipasaun iha asaun ne’e nu’udar solidariedade ba malu tanba konsidera problema ne’ebé maka akontese hosi fakuldade sia nia.

“Ami eziji iha asaun pasífika ne’e, atu universidade responde problema estudante sira, liu-liu kona-ba manuál akadémiku, sertifikadu no almamater tanba sasán hirak ne’e pakote ho orientasaun akadémiku hamutuk de’it, maibé universidade la responde ba estudante sira iha tempu orientasaun, enkuantu orientasaun ramata ona iha 2021 to’o ohin loron mak foin distribuisaun fali ba estudante,” António dos Santos hateten iha kampus sentrál UNTL, kuarta ne’e.

Notísia relevante: AAE FEAH husu UNTL devolve osan tanba la hetan manuál orientasaun akadémika

Senadu Fakuldade Siensias Sosiál, António Dos Santos. Imajen Tatoli/Francisco Sony

Tuir Reprezentante estudante ne’e, loloos fasilidade sira tenke distribui antes orientasaun hahú atu estudante foun bele hatene estrutura universidade, estrutura fakuldade inklui atividade universidade, tanba ne’e hanesan prosesu ida hosi atividade orientasaun atu estudante sira bele hatene.

“Universidade laiha kapasidade atu jere osan ne’ebé estudante sira selu ba orientasaun ne’e, sira la jere ho di’ak tanba la tuir ona nesesidade tempu ne’ebé estudante sira presiza,” nia akresenta.

Iha biban hanesan, Senadu FEAH, Constáncio Noronha de Araujo, konsidera UNTL halo promesa barak ba estudante maibé laiha resposta.

Estudante FEAH no FSS UNTL halo asaun pasífika iha edifísiu sentrál UNTL, kuarta (08/06). Imajen Tatoli/Francisco Sony

“Realidade estudante sira sai vítima ba prosesu ensinu aprendizajen, sira laiha fasilidade adekuadu,” nia tenik.

Nune’e, estudante sira hein to’o hetan resposta hosi Reitór universidade no garante katak universidade sei rezolve.

Ba kestaun ne’e, Agência Tatoli tenta konfirma Reitór UNTL, João Martins, maibé la konsenge rtanba laiha fatin.

Antes ne’e, kada estudante hamutuk 2.089 hosi tinan akadémiku 2021 halo rejistrasaun ho osan $87 no osan ba manuál orientasaun $4.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here