Prezidente Repúblika, José Ramos Horta, hasoru malu ho Prezidente Parlamentu Nasionál (PPN), Aniceto Longuinhos Guterres Lopes, iha salaun enkontru PPN, sesta (29/04). Imajen Tatoli/Francisco Sony.

DILI, 09 juñu 2022 (TATOLI)—Prezidente Parlamentu Nasionál, Aniceto Longuinhos Guterres Lopes, hateten PN hein programa diálogu ne’ebé sei inisia hosi Prezidente Repúblika, José Ramos Horta.

Notisia Relevante: Horta prefere diálogu duké disolve Parlamentu Nasionál

“Diálogu ne’e, Prezidente Repúblika nia programa maibé diálogu ne’e la’ós ho Prezidente Parlamentu Nasionál nia programa. Maibé ho PN iha kompozisaun no barak liu ho bankada parlamentár tanba polítika iha ne’ebá, entaun Parlamentu Nasionál hein hela programa diálogu ne’e,” Prezidente PN ne’e hateten ba Agência Tatoli liuhosi entrevista eskluzivu iha nia knar fatin PN, kuarta (08/06).

Antes ne’e, bainhira simu pose atuál Xefe Estadu kompromete an sei promove diálogu ho órgaun soberania, lidér nasionál, partidu sira-ne’ebé la hetan asentu parlamentár, igreja, sosiedade sivíl, akademiku hodi lori dezenvolvimentu nasaun ba oin, oinsá haree prioridade sira seluk hanesan edukasaun, saúde, agrikultura, seguransa alimentár, kombate má nutrisaun, tranzisaun jerasionál, hodi haree dezenvolvimentu.

Mezmu nune’e, hafoin Prezidente Repúblika simu pose, PN seidauk simu karta ofisiál ruma hosi Xefe Estadu atu hala’o diálogu ho inisiativa PR nian nune’e kontinua hein PR no pronto atu kontribui.

“To’o agora ofisiál seidauk. Diálogu ne’e, hanesan aktu polítiku ida hodi atu estabiliza situasaun,” Aniceto Guterres hateten

Iha parte seluk, Prezidente Parlamentu Nasionál ne’e hateten relasaun instituisionál entre Parlamentu nasionál ho Prezidente Repúlika la’o di’ak.

“Relasaun instituisionál ita laiha problema ida se iha problema karik Prezidente Repúblika, Ramos Horta, mós la hola pose,” nia dehan.

Tanba ne’e, nia hateten, bainhira antes ne’e hasoru malu ho PR eleitu liu tiha eleisaun atu haluha tiha naksalak sira hodi haree ba faze afirmasaun Estadu.

“Uluk mai foufoun kedas depois eleisaun, PR eleitu tiha mai iha ne’e, ha’u hateten kedas faze kampaña ne’e ita liu ona, ne’ebé haluha liafuan sira naksalak. Agora, faze ba afirmasaun Estadu no Estadu ne’e funsiona hanesan instituisaun no órgaun iha sistema separasaun kada órgaun hala’o tuir nia knar,” nia dehan.

Nune’e, Prezidente PN ne’e fiar relasaun instituisionál ho Prezidente Repúblika ba oin sei la’o di’ak liután.

“Ha’u fiar di’ak no ita la’o tuir regra konstituisaun. Se ita labele ida teimozu kada instituisaun, dehan se ita ko’alia kona-ba konstituisaun ninia interpretasaun mak loos liu, labele, tenke la’o tuir Sistema. Se ita iha diferensa kona-ba interpretasaun konstituisaun ne’e, tanba konstituisaun interpretasaun dehan desizaun ida Tribunál mak vinkula Estadu tomak,” nia hateten.

Nia hatutan, atu Prezidente Repúblika, Deputadu no sé de’it iha rai ne’e tenke hakruk ba desizaun Tribunál tanba se ko’alia kona-ba interpretasaun Tribunál nian mak loos liu, tan ne’e kuandu ita iha diferensa la konkorda órgaun ida seluk nia interpretasaun lori ba Tribunál.

Jornalista : Nelson de Sousa

Editór       : Cancio Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here