Prezidente Repúblika, Ramos Horta .Imajen Tatoli/Antonio Daciparu

DILI, 08 juñu 2022 (TATOLI)— Prezidente Repúblika, José Ramos Horta, hateten nia-parte prioritiza diálogu ho orgaun sobernu no líder nasionál sira hodi apoia VIII Governu konstitusionál hodi solusiona problema povu-nia duké disolve Parlamentu Nasionál (PN).

“Disolusaun Parlamentu nasionál, la’ós opsaun polítika ba situasaun Timor-Leste ohin loron nian. Tanba mundu oin loron enfrenta problema hamlaha tanba kauza hosi COVID-19 no funu entre Ukraina no Rusia. Nune’e atu Timor-Leste liuliu populasaun labele mate ba krize hamlaha entaun presiza diálogu ho órgaun soberanu no líder nasionál sira atu hamutuk apoia VIII Governnu ne’ebé lidera hosi Primeiru Ministru Taur Matan Ruak atu solusiona situsaun ne’e,” Prezidente Repúblika Ramos Horta, hateten ba Jornalista sira iha salaun UNTL,Hera. Kuarta ne’e.

Maske halo kompromisu ho Partidu Kongressu Nasionál Rekonstrusaun Timor-Leste (CNRT) hodi disolve Parlamentu Nasionál, maibé situasaun atuál iha mundu liuliu iha Timor-Leste defisil tanba folin nesesidade báziku sa’e makas, nune’e tenke buka diálogu atu hamutuk solusiona kestaun ne’e.

“Teorikamente tuir ha’u nian interpretasaun Konstituisaun, ha’u bele disolve Parlamentu Nasionál no bele demite Governu, maibé ne’e la’os solusaun di’ak ba rai ne’e. Maun bo’ot Xanana rasik nia hateten ita labele kontribui para situasaun sai pior liután, ita labele fó responsablidade ba Governu mesak,” Xefe Estadu ne’e esplika.

Funu entre Ukraina no Rusia no pandemia globál afeta ba folin sasán sa’e iha mundu tomak no mós iha Timor-Leste.

“Tanba ne’e, Maun bo’ot Xanana Gusmão hateten ona ba ha’u hodi konkorda tiha ona 100%, ita buka halo diálogu para haree oinsá apoia Governu,” nia afirma.

Nune’e, Xefe Estadu ne’e dehan sei buka hodi aprosima órgaun soberanu sira hotu inklui líder nasionál sira atu buka solusaun ba situsaun ekonómia ne’ebé dadaun mundu enfreta no Timor-Leste.

“Ha’u buka mak serbisu ho Governu, Parlamentu Nasionál no kontinua husu apoia makas ba komunidade internasionál para apoia Governu bele governa ho di’ak,” Xefe Estadu afirma.

Tanba, responsablidade Prezidente Repúblika nian garante pás no estabilidade atu governu bele governa avontade hodi resolve situasaun povu nian.

“Ha’u hahú ona halo diálogu ho órgaun soberanu ho Primeiru Ministru no dadaun plata forma bankada parlamentár hahú kontaktu la’o ona. Ha’u ho maun Xanana halo enkontru regular, la’ós tanba komprimisiu apoia ha’u, maibé tanba nia líder nasionál ida ne’ebe matenek, ha’u respeitu ba nia ha’u tuun too ba nia (Xanana) hodi halo diálogu. Eis Primeiru Ministru Mari Alkatiri mós ha’u hasoru ona hodi ko’alia kona-ba diálogu,” PR Horta informa.

PR Horta hatutan: “Faze dahuluk ha’u hahú diálogu ho líder nasionál sira, agora faze tuir mai mak ita foin tama ba subtánsia, liuliu saida mak governu ne’e tenke buka ko’alia ho oposizaun iha Parlamentu Nasionál, kuandu atu halo orsamentu retifikativu no halo orsamentu foun 2023. Tanba Ha’u hakarak hahú kedan ko’alia ho oposizaun atu labele buat hotu aprova liu de’it tanba iha maioria,” nia afirma.

Xefe Estadu ne’e kompromete sei ajuda VIII Governu Konstitusionál durante mandatu hodi halo funsaun ho di’ak.

“Lakohi difikulta tan fali governu nian serbisu, portantu Primeiru Ministru Taur Matan Ruak no membru Governu presiza buat ruma hosi Prezidente Repúblika no nu’udar pesoál ha’u bele ajuda,” nia afirma.

Jornalista: Natalino Costa

Editór       : Florencio Miranda Ximenes

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here