iklan

DILI, HEADLINE, POLÍTIKA

PM Taur apresia PR Horta promove diálogu ho órgaun soberania

DILI, 09 juñu 2022 (TATOLI)—Primeiru-Ministru (PM), Taur Matan Ruak, apresia Prezidente Repúblika, José Ramos Horta, ne’ebé ko’alia bebeik atu inisia hodi promove programa diálogu ho órgaun soberania, lidér nasionál, partidu sira-ne’ebé la hetan asentu parlamentár no entidade hotu-hotu hodi haree dezenvolvimentu.

Notísia Relevante: PN hein programa diálogu hosi PR Horta

“Ha’u hanoin nasaun louva Prezidente Repúblika nia repete fila-fila atu halo diálogu ne’e nia intensaun, no ha’u hanesan Xefe Governu kontente loos ho pozisaun PR nian. Tanba hanesan imi (jornalista) hatene ita-nia nasaun só ba oin, se ita hotu halo esforsu bo’ot ida atu asegura estabilidade polítika no governativa iha ita-nia nasaun,” PM Taur hateten hodi responde Agéncia Tatoli hafoin ramata enkontru semenál ho Xefe Estadu, iha Palásiu Prezidensiál, Bairru Pite, kinta ne’e.

Tuir PM, nasaun iha ona esperiénsia ho situasaun polítika ne’ebé hasoru lori dezenvolvimentu ba fali kotuk.

“Iha ita-nia esperiénsia rasik iha tinan 2017 to’o 2020 ne’e la ajuda kontráriu lori ita-nia nasaun ba fali kotuk. Entaun, ha’u hanoin ne’e esperiénsia ita-nian rasik,” nia dehan.

Hafoin PR simu pose ba dadaun ne’e PM no Xefe Estadu kada kinta-feira realiza enkontru semenál hodi relata servisu Governu nian ne’ebé relasaun instituisional Governu ho Prezidente Repúblika la’o di’ak.

Tanba ne’e, Xefe Governu sente kontente loos ho esforsu Xefe Estadu nian atu halo diálogu, tanba ne’e komunikasaun Primeiru-Ministru ho Prezidente Repúblika ba inisiativa diálogu la’o no Governu prontu kontribui.

“Kada kinta feira ha’u hala’o enkontru no ko’alia beibeik atividade Governu nian ho Prezidente Repúblika hateten repete bebeik kontinua halo esforsu hodi fasilita atividade Governu nian ne’e, ami agradese bo’ot,” Taur Matan Ruak hateten.

Jornalista : Nelson de Sousa

Editór        : Cancio Ximenes

iklan
iklan

Leave a Reply

iklan
error: Content is protected !!