Deputadu Francisco Branco. Imajen/TATOLI

DILI, 13 outubru 2020 (TATOLI)—Bankada Frente Revolusionária Timor-Leste (FRETILIN) husu Parlamentu Nasionál atu halo reabertura ba projetu-lei direitu ba autór nune’e valoriza obra literasia no artístika timoroan sira.

Bankada FRETILIN ko’alia asuntu ne’e relasiona loron kultura ne’ebé sei selebra iha aban, kuarta (14/10/2020).

“Dalan ida maka presiza iha lei hodi ita hotu bele apresia no valoriza autór timoroan rasik, ba sira-nia obra literaria no obra artístika. Tanba ne’e importante atu halo reabertura fali projetu-lei Direito de Autor, hodi nune’e bele lori ba aprovasaun finál no globál. Lei direitu ba autór (Direito de Autor) sei fó protesaun obra literária sira hanesan monografia, teze no disertasaun; publikasaun ba livru, revista, artigu, reportajén no eskrita sira seluk,“ Xefe Bankada FRETILIN, Deputadu Francisco Miranda Branco, informa liuhosi plenária Parlamentu Nasionál, tersa ne’e.

Xefe Bankada FRETILIN ne’e fundamenta, lei direitu ba autór ne’e mak bele fó protesaun ba obra artístika sira hanesan literatura, múzika, dansa, dahur, moda, soru-tais, gastronomia, pintura, eskultura, arkitetura, arte-plástika, teatru no filme sira tanba obra hirak-ne’e nu’udar propriedade intelektuál atu ema ida labele kópia arbiru la tuir regra ne’ebé vigora.

Nia dehan, lei direitu ba autór ne’e sei proteje timoroan sira-nia obra literária no artístika sira hosi plájiu ka kópia, prinsipalmente ba interese komersiál. Maibé protesaun de’it la sufisiente, tenke iha asaun reál kontinuada hodi hakbi’it hodi peskiza, dokumenta no prezerva atu bele transmite nafatin ba jerasaun tuir mai.

“Ida-ne’e mós sei evita nasaun seluk hodi reindivika ita-nia produtu sira no ikus-mai ba rejista iha UNESCO nu’udar sira-nia rikusoin,“ nia dehan.

Deputadu Branco haktuir, tempu to’o ona atu valoriza artista timoroan sira ne’ebé reprezenta no halo morin nasaun iha mundu internasionál atu hetan atensaun no apoia polítiku hosi Governu.

Tanba ne’e iha rai-laran tenke hahú insentiva artista timoroan sira atu hetan duni palku no sai estrela, labele sai fali bainaka iha okaziaun no serimónia prinsipál nasionál sira.

“Ita mós tenke hahú haforsa programa kulturál sira hanesan festivál, karnavál, palku muzikál, espetákulu no teatru populár sira no kria kompetisaun ida regulár hodi estimula ita-nia artista sira-nia produtividade,“ nia dehan.

Bankada FRETILIN propooin fó bolsa ba artista ka autór sira atu iha interasaun ho obra artístika nível mundiál, iha nível universitáriu no festivál sira iha rai-li’ur hanesan iha espasu CPLP (Comunidade Paises da Língua Portuguesa) hodi bele eleva sira-nia kualidade hodi hasa’e kapasidade atu prodús obra sira ne’ebé Timor-Leste nia ambiente sosiál rasik.  

Bankada FRETILIN afirma, tempu to’o ona atu realiza Planu Estratégiku Dezenvolvimentu Nasionál (PEDN) nia meta ba 2011-2030, katak to’o tinan 2015, estabelese ona akademia arte, kultura no Indústria kriativa sira maibé iha realidade to’o ohin loron seidauk estabelese.

Nune’e mós haree ba prezensa sentru kulturál rai-seluk nian, tempu to’o ona ba Timor-Leste nu’udar Estadu no nu’udar nasaun hodi harii ita-nia sentru kulturál rasik nune’e bele dezenvolve atividade kulturál sira.

Bankada FRETILIN husu harii muzeu no monumentu sira hodi rai-hela obra artístika sira iha-ne’ebá hodi prezerva sira-nia memória, harii biblioteka sira no hala’o kampaña literasia liuliu juventude sira iha interese liu ba leitura, nune’e dezenvolve sira-nia intelektualidade no sei estimula ba produsaun no koñesimentu.

“Tenke investe ona ba Belas Artes, tanba hanesan sosiedade ida, Timor-Leste presiza obra artístika sira ne’ebé sei lori espíritu no vida ba iha dezenvolvimentu inkluzivu, ne’ebé sei laiha ema ka grupu ida maka eskluídu,” Xefe Bankada FRETILIN ne’e hateten.

Bankada FRETILIN apresia tebes Estadu ne’ebé atu kondekora kantór, saudozu Chico Maulohi hanesan luta-na’in no artista lendáriu ida.

Nu’udar kompozitór, saudozu hakerek letra ba knananuk sira ho tema kona-ba rezisténsia maibé hafalun ho linguajen baibain ka utiliza rekursu estilístiku relata sofrimentu, luta, sakrifísiu, domin no liuliu timoroan nia moris iha tempu difísil durante okupasaun indonézia.

“Ohin loron, saudozu lahamutuk ona ho ita maibé ninia kansaun sira nafatin fó kór dinámiku iha ita-nia vida quotidiana. Obra artístika ita-nian, atu ita rasik sai na’in, valoriza no fó dimensaun luan ba ita-nia moris loroloron. Labele ema seluk sai na’in ba ita-nia rain no ita-nia obra sira, no ita sai espetadór ka penonton de’it,” Xefe Bankada FRETILIN ne’e fó hanoin.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here