Traballadór sira hasai foto hamutuk ho entidade relevante hafoin asina deklarasaun, iha salaun Otél Timor Lodge, kinta (09/06). Imajen/SEFOPE

DILI, 09 juñu 2022 (TATOLI)—Sekretaria Estadu Formasaun Profisionál no Empregu (SEFOPE) liuhosi Diresaun Nasionál Empregu Exteriór (DNEE), hahú hosi janeiru to’o juñu 2022, haruka ona traballadór timor-oan na’in-595 ba serbisu iha Koreia Súl.

“Ohin ita asina tan deklarasaun ho família traballadór na’in-66, ne’ebé sei aranka bá Koreia Súl iha loron 13 juñu, entaun ita konta traballadór bá hamutuk ona 595,” Diretór Nasionál Empregu Exteriór, Filomeno Soares, hateten, iha Otél Timor Lodge, kinta ne’e.

Notísia relevante: SEFOPE haruka tan traballadór timor-oan 87 serbisu iha Koreia Súl

Totál trablladór ne’ebé ba serbisu ona iha Koreia Súl desde tinan 2009 to’o 2022 hamutuk 4.457, ne’ebé hosi númeru ne’e, traballadór ne’ebé filafali mai ona Timór hamutuk 962 no sira ne’ebé sei kontinua serbisu iha Koreia Súl hamutuk 3.431.

“Haree hosi númeru traballadór ne’e hatudu katak Governu Koreia Súl kontinua fó fiar ba ita atu ba serbisu iha Koreia Súl. Nune’e, ha’u husu ba imi ne’ebé hetan ona oportunidade, liuliu imi na’in-66 ne’ebé ohin asina ona deklarasaun, aproveita didi’ak tanba ida-ne’e hanesan pasu di’ak ida atubele hadi’a imi-nia moris,” nia akresenta.

Diretór mós husu ba traballadór sira, bainhira to’o ema-nia nasaun tenke respeita regulamentu ne’ebé iha, hatudu komportamentu di’ak, no lebele ses hosi sistema hodi nune’e empregadór sira hosi bele fó tan oportunidade ba joven timor-oan sira ne’ebé hein hela.

Trablladór na’in-66 ne’ebé ohin ho família asina deklarasaun ho Governu liuhosi SEFOPE ne’e sei ba serbisu iha área peska hotu.

Jornalista : Arminda Fonseca

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here