Atividade sosializasaun rezultadu estudu IPG, iha munisípiu Lautém, kinta (09/06). Imajen Tatoli/Antónia Gusmão

LAUTÉM, 09 juñu 2022 (TATOLI)–Institutu Petróleu no Jeolojia (IPG, sigla portugés), kinta ne’e, realiza atividade sosializasaun rezultadu peskiza IPG kona-ba dezastre naturál iha Lautém.

Administradór Lautém, Domingos Sávio, hateten, rezultadu peskiza ne’e nu’udar baze ida hodi utiliza ba dezenvolvimentu iha munisípiu, tanba laiha estudu ida entaun komunidade halo tiha uma la kleur rai monu halo lakon osan, lakon tempu no lakon enerjia.

“Ha’u kontente tebes bainhira rona IPG halo peskiza. Bainhira ha’u partisipa reuniaun iha nasionál, ha’u sempre hato’o kestaun tau osan ba peskiza, kontente ita-nia nasaun bele kria ona Institutu Petróleu no Jeolojia, sira ne’e bele diskobre ita-nia rikusoin iha rai okos no rai leten,” Autoridade munisipál hateten iha ámbitu halo abertura ba atividade sosializasaun, iha salaun Servisu Edukasaun Minisípiu Lautém.

Tuir Domingos Sávio, peskiza importante ba dezenvolvimentu tanba bainhira laiha peskiza maka susar, Ministériu Ordenamentu Territóriu sei mai halo fiksa iha fronteira sira, hafoin halo planu mestre munisipál.

“Kuandu ita hateten atu halo dezenvolvimentu ida, tenki iha baze hanesan peskiza, tanba bainhira laiha ema dehan halo dezenvolvimentu ne’e la loos, tanba kestaun hirak ne’e mak asegura no salva ba ita-nia terrenu,” nia akresenta.

Notísia relevante: Administradór Viqueque husu apoia IPG halo estudu ba bee-moos

Administradór nota mós katak, ikus mai komunidade halo to’os hakarak besik iha estrada, rai ne’ebé fasil monu, no tesi ai barak atu kuda batar.

“Tanba ne’e, hafoin ita rona informasaun sira husu ba autoridade sira atu filafali ba fó hanoin ba to’os-na’in sira para sira bele kuda ai iha rai ne’ebé halai, tanba bainhira rai halai, inundasaun ne’e ameasa ba ema-nia vida. udan boot hamosu inundasaun bele lori komunidade-nia uma, animál no dala ruma mós ema, kuandu estrada ida kotu tanba ema-nia hahalok bele impede buat barak, rai ida monu, entaun ita hotu-hotu tenki asegura iha ita-nia rai tanba dadus ne’e di’ak bainhira ita halo dezenvolvimentu infraestrutura bele hatene ona fatin sira,” nia rekomenda.

Iha biban hanesan, Prezidente IPG, Gabriel Gaspar Aparício de Oliveira, hateten, instititutu harii iha tinan 2012 ho knaar mak halo peskiza ba risku jeolójiku hanesan inundasaun, rai-halai, erosaun kosteira, rai-nakdoko, risku jeolójiku inklui estudu ba bee iha rai okos.

“Institutu halo estudu hodi intende didi’ak ita-nia natureza, oinsá maka ita moris hamutuk ho natureza no fenómena natureza labele fó impaktu natureza, ne’ebé rekolla informasaun sira liuhosi peskiza IPG tau iha mapa. Atividade ne’e ho objetivu atu partilla informasaun hosi rezultadu estudu iha Lautém hodi ita hotu intende ba oin entidade munisipál hatene katak informasaun sira ne’e pertinente atu to’o iha faze ordenamentu, entaun ita hatene ona fatin sira ne’ebé iha risku labele halo uma, halo to’os ka buat seluk,” nia tenik.

Ministériu Planu no Ordenamentu (MPO) sei utiliza rezultadu peskiza IPG hodi halo planu ordenamentu, tanba daudaun ne’e ministériu prepara ordenamentu territóriu ninia lala’ok ho di’ak, ne’ebé dadus mai hosi peskiza sira.

Peskiza ne’ebé ekipa IPG halo iha área risku jeolójiku hanesan rai nakdoko, rai halai, inundasaun no erozaun kosteira, ne’ebé peskiza hala’o iha loron 17 juñu to’o 21 outubru 2021.

Antes ne’e, IPG halo ona disemina rezultadu peskiza iha munisípiu Manufahi, Ainaro, Viqueque no dadaun iha Lautém.

Atividade ne’e partisipa direta hosi Administradór munisipál, postu administrativu, autoridade komunitáriu, autoridade seguransa, no populasaun balun.

Jornalista : Antónia Gusmão

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here