DILI, 07 juñu 2022 (TATOLI)–Administradór Munisípiu Viqueque, Januário Soares ‘Bolly’, husu apoia tékniku hosi Institutu Petróleu no Jeolojia (IPG, sigla portugés) hodi halo estudu ba bee-moos iha munisípiu Viqueque molok halo perfurasaun.
“Iha Viqueque bainhira dada bee, fornesementu hosi Loihunu mai, dala ruma balun hakarak ke’e bee maibé iha difikuldade, ne’ebé ha’u-nia hanoin sempre liga ba IPG hodi halo peskiza uluk tanba dala ruma komunidade ke’e bee selu tiha ema maibé rezultadu laiha, maibé ho IPG nia ekipamentu sofestikadu, ha’u hanoin bele ajuda deskobre fatin sira ne’ebé iha bee, nune’e ajuda komunidade asesu ba bee-moos,” Administradór hato’o pedidu ne’e iha ámbitu IPG halo sosializasaun rezultadu peskiza risku jeolojia iha munisípiu Viqueque, iha salaun administrasaun munisipál, tersa ne’e.
Notísia relevante: Ekipa IPG hahú halo estudu perfurasaun bee-moos iha Cribas
Autoridade munisipál ne’e dehan, ho apoia hosi IPG bele ajuda halo peskiza ba bee sulin hosi foho tun to’o mota, nune’e komunidade bele ke’e bee.
Biban hanesan, Prezidente IPG, Gabriel Gaspar Aparício de Oliveira, hateten, Bee Timor-Leste (BTL) mak haree serbisu bee sira iha rai leten no sei akumula hodi distribui ba komunidade.
“Kuandu bee iha ona rai-okos, laiha ema ida mak hatene liu do que tékniku sira ne’ebé estuda kona-ba rai ne’e rasik. Tanba ne’e, karik iha Viqueque iha ema ruma tantu populasaun ka empreza ruma hakarak halo perfurasaun ba bee-moos tenki liuhosi estudu se lae gasta de’it osan,” Prezidente IPG sujere.
Responsável institutu ne’e dehan, bazeia ba esperiensia iha tinan 2015 iha munisípiu Baucau, Governu Austrália apoia ekipamentu no uza aviaun helikóptru hodi leno hotu tiha mak halo perfurasaun to’o dala-tolu la hetan bee.
“Foin lalais Komandante F-FDTL iha Baucau haruka karta ba IPG hodi ajuda empreza ne’ebé atu halo perfurasaun bee ba sira, ne’ebé hosi rezultadu peskiza IPG ba dahuluk fura bee ho susesu, fura dala-ida de’it hetan ona bee. Daudaun ne’e IPG halo atividade iha Laga, kuandu rezolve ona mak sei kontinua ba Mehara Lautém. BTL rasik hakfodak bainhira ami diskobre bee ho rekursu boot tebes iha Cribas, munisípiu Manatuto, agora iha faze halo tangki hodi distribui ba kada uma. Bazeia ba esperiensia, akontese iha fatin ida, iha empreza balun maka halo perfurasaun maibé la liu hosi peskiza, ikus mai hasoru difikuldade,” nia tenik.
Jornalista : Antónia Gusmão
Editora : Julia Chatarina
