Asosiasaun Akadémika Estudantíl hosi FEAH UNTL halo konferénsia imprensa iha kampus liseu, kinta (07/04). Imajen TATOLI/Tomé Amado

DILI, 07 abril 2022 (TATOLI)–Asosiasaun Akadémika Estudantíl (AAE) hosi Fakuldade Edukasaun Arte no Umanidade (FEAH) Universidade Nasionál Timor-Lorosa’e (UNTL) husu universidade devolve osan $8.356 hosi estudante hamutuk 2.089 tanba desde tinan 2021 to’o agora seidauk simu manuál orientasaun akadémika.

Tuir Reprezentante Estudante hosi FEAH, Zesinho da Silva Barreto, kada estudante halo rejistrasaun $87 no osan ba manuál orientasaun $4.

“Ami hosi órgaun másimu estudante sira-nia iha nível fakuldade, husu ba Reitór UNTL, João Soares Martins, atu hatún despaixu ida hodi devolve filafali estudante sira-nia osan ne’ebé entrega ona. Ami promete orientasaun akadémika ida ne’e ramata, organiza filafali estudante sira hosi turnu 2021 no 2022 atu ba ezije sira-nia direitu ne’ebé to’o agora universidade la responde,” Zesinho da Silva hateten iha kampus liseu, kinta ne’e.

Estudante universitáriu sira konsidera, normalmente manuál orientasaun akadémika distribui ba estudante sira iha momentu orientasaun akadémika realiza, la’ós aula normál ona maka foin distribui.

“Iha situasaun ne’e estudante sira la hetan matadalan ka manuál ba orientasaun akadémika atu sira bele kaer rasik,” nia akresenta.

Notísia relevante: Seidauk Akredita, FEAH-UNTL kontinua prepara kondisaun

Tanba ne’e maka Asosiasaun Akadémika Estudantíl FEAH nu’udar organizasaun estudante sira hato’o aspirasaun estudante sira no direitu balun.

“Ami la ezije manuál ne’e tenke imprime ba estudante sira, maibé estudante sira entrega ona osan ba UNTL maibé ikus mai la fó resposta,” estudante ne’e hato’o.

Aleinde ne’e, Asosiasaun akadémika Estudante FEAH lamenta tebes ho kualidade serbisu estrutura UNTL ne’ebé laiha seriedade halo atendimentu ba estudante sira, liu-liu ba direitu estudante.

“Ami husu ba Reitór atu labele sai subordinadu ba estrutura sira iha ita-boot nia okos, atu nune’e labele prejudika serbisu administrasaun UNTL. Husu mós ba Vise-Reitór, Pro-Reitór, no Diretór Jerál sira atu labele fó sala beibeik ba lei aprovizionamentu. UNTL hakarak atinje ninia vizaun sai sentru exelente, la’ós de’it estrutura atuál nia servisu iha mandatu agora, maibé entidade hotu nia apoiu hahú hosi estudante, dosente no funsionáriu sira hotu,” Zesinho da Silva dehan.

Enkuantu, UNTL nu’udar úniku universidade públiku iha Timor-Leste, ne’ebé daudaun iha fakuldade sia, kompostu hosi departamentu 40-resin, FEAH mak hanesan fakuldade ne’ebé boot liu iha UNTL kompostu hosi departamentu 10.

Portantu kada tinan FEAH UNTL simu estudante foun ho kuantidade 1.000 resin, maski espasu sala aula la sufisiente.

Manuál orientasaun tama konkursu

Iha fatin ketak, Reitór UNTL, João Sores Martins, Admite katak laiha koñesimentu kona-ba asuntu ne’e tanba nia la hetan informasaun, maibé nia hein hela informasaun hosi Finansa no bainhira tama ona iha ninia meza maka bele pasa informasaun ba públiku.

Nune’e mós, Vise-Reitór ne’ebé trata asuntu Akadémiku no Garantia Kualidade UNTL, Samuel Venâncio de Sousa Freitas, hateten, asuntu kona-ba manuál orientasaun akadémika daudaun ne’e tama ona iha prosesu konkursu iha, ne’ebé iha ona empreza ida maka prepara atu prodús,

“Tempu besik bele distribui ona ba estudante sira. Ita buka ona mekanizmu di’ak ida ba estudante sira iha tinan akadémiku 2021-2022 ne’e maka daudaun ne’e manuál orientasaun akadémiku dijitál ita prepara ona ninia softcopy, ne’ebé ita tau ona iha pájina UNTL, ita orienta hela estudante sira bele asesu lai hodi hein empreza halo produsaun,” nia haktuir.

Tuir Samuel, ezijénsia Asosiasaun Akadémika Estudantíl atu husu universidade atu devolve fali estudante nia osan ne’e difisil oituan tanba prosesu produsaun la’o ona, ne’ebé tempu besik atu distribui ona ba estudante sira.

Nia esplika, bainhira prosesu konkursu la’o hela, universidade halo ona enkontru ho parte hotu inklui senadu fakuldade sia hosi esplika katak bainhira UNTL ne’e mak instituisaun privadu ida la difisil, maibé tanba instituisaun públiku maka buat hotu tenke liuhosi aprovizionamentu.

“Ninia prosesu mak hanesan ne’e, husu ba estudante sira atu asesu lai softcopy iha pájina Facebook UNTL nian, kuandu manuál iha ona maka distribui tan ba estudante sira. Ita halo esplikasaun kona-ba asuntu sira ne’e hodi estudante sira ho ninia senadu sira maka la hetan informasaun bele pasa tan ba sira atubele komprende hodi la’o tuir,” nia dehan.

Jornalista : Tomé Amado

Editora      : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here