Traballadór timor-oan sa’e Aviaun Qantas iha Aeroportu Comoro hodi aranka ba Austrália, kuarta (24/02). Imajen TATOLI/António Gonçalves

DILI, 07 juñu 2022 (TATOLI)—Primeiru-Ministru (PM), Taur Matan Ruak, triste rona traballadór timor-oan lubuk ne’ebé serbisu iha Austrália halai sees hosi sistema ne’ebé regula iha nasaun ne’e.

“Ha’u triste tanba rona iha traballadór timor-oan balun hatudu atetude ladi’ak iha ema-nia rain no barak mak halai sees hosi sistema. Ha’u husu ba traballadór sira atu labele haluha regulamentu, tanba lei sira ne’e ema mak halo hanesan mós uma ida iha janela no odamatan, kuandu traballadór timor-oan ida maka halai sees, labele hanoin sees ona hosi buat hotu maibé loloos ne’e sei iha hela sistema ida mak a’at liu fali ida-ne’e,” PM Taur hateten iha serimónia despedida traballadór nain-214 iha salaun Delta Nova, tersa ne’e.

Notísia relevante: PM Taur husu traballadór timor-oan kuidadu imajen nasaun iha Austrália

Tanba ne’e, Xefe Governu husu ba traballadór timor-oan sira ne’ebé sei dezloka ba Austrália iha tempu besik, labele halo tuir hahalok ladi’ak sira maibé buka halo di’ak no kumpre nafatin sistema nasaun Austrália atu labele prejudika fali traballadór sira-nia serbisu.

Nune’e mós, Diretór Nasionál Empregu Exterior (DNEE) hosi Sekretaria Estadu Formasaun Profisionál no Empregu (SEPFOPE), Filomeno Soares, hateten, hosi traballadór 333 ne’ebé halai sees hosi sistema Austrália, agora kuaze besik 100 maka filafali mai hodi tama ba sistema normál, tanba sira rasik deskobre katak bainhira komete ba aktu ne’e sei prejudika sira-nia moris iha Australia.

“Tanba ne’e, Governu nasaun rua ne’e buka ona meius atu rezolve kauza ne’e atubele kontinua hetan konfiansa hodi haruka nafatin traballadór timor-oan sira ba serbisu iha nasaun ne’e. Tanba SEPFOPE hakarak atu aplika asaun sira ne’e tenke iha koordenasaun atu nune’e labele prejudika fali ema seluk ninia moris. Tanba serbisu ba Austrália ne’e hanesan oportunidade ida ba joven sira,” nia akresenta.

Daudaun ne’e, Governu Timor-Leste no Austrália liuhosi ekipa SEPFOPE no Embaixadór rasik buka hela meiu atu rezolve problema ne’e hodi bele kontinua hetan nafatin konfiansa hosi Governu Austrália no bele fó fiar ba ninia empregadór no ajénsia Austrália sira bele foti nafatin traballadór sira atu ba serbisu iha ne’ebá.

“Ita rasik iha ona hanoin ida atubele fó sansaun ba sira bainhira sira filafali mai Timor Leste, sira sei la hetan tan oportunidade atu kontinua serbisu iha Austrália. Tanba ne’e, maka ita sei haree hela oinsá atu serbisu hamutuk ho entidade sira atubele foti asaun ruma bainhira aplika sistema ka sansaun ruma hasoru traballadór sira,” PM tenik.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

2 KOMENTÁRIU

  1. Diak Liu antes atu Haruka trabalhador Sira ba fo uluk kriteria no rekezitus…no seinsiviliza Lei no Sistema nasaun nian ba trabalhador Sira bele hatene no kompriende atu nunee to neba karik Sira labele halo buat arbiru.Obrigado

HAKEREK NO HATÁN

Please enter your comment!
Please enter your name here