Primeiru-Ministru, Taur Matan Ruak. Imajen Tatoli/António Daciparu

DILI, 07 juñu 2021 (TATOLI)—Primeiru-Ministru (PM), Taur Mata Ruak, husu ba traballadór timor-oan hamutuk na’in-214 atu kuidadu imajen nasaun iha nasaun viziñu Austrália no hakribi hahalok ladi’ak.

“Ha’u husu ba imi traballadór sira ne’ebé atu bá serbisu iha Austrália, atu labele halo fali buat ne’ebé ladi’ak, hanesan Polísia kaptura traballadór timor-oan balun iha Aeroportu bainhira haruka fali droga mai ninia família iha Timór, ne’e labele akontese ba ita-boot sira ne’ebé bá serbisu iha Austrália,” PM Taur hateten iha serimónia despedida traballadór timor-oan sira, iha salaun Delta Nova, tersa ne’e.

Notísia relevante: Empreza Medfield planeia rekruta traballadór timor-oan 50 serbisu iha Austrália

Aleinde ne’e, Xefe Governu fó hanoin ba traballadór sira hodi labele halai ses hosi sistema no tenke kumpre regulamentu sira, tanba lei iha nasaun ida hanesan mós uma ida ne’ebé iha janela no odomatan.

“Traballadór timor-oan sira ne’ebé sei bá serbisu iha Austrália hanesan Embaixadór ida, entaun ema ida tenke sai Embaixadór ba nasaun ne’e liuhosi hahalok di’ak, bainhira serbisu iha ne’ebá, buat ne’ebé ladi’ak husik hela iha aeroportu bainhira sai ona aviaun lori buat ne’ebé di’ak ba Austrália. Tenke kria relasaun di’ak ho patraun sira, tanba iha fatin balun ne’ebé traballadór timor-oan sira serbisu ba, rona katak iha relasaun di’ak tebes ho patraun sira, ne’e hahalok di’ak,” Xefe Ezekutivu fó hanoin.

Iha tinan 2021, traballadór timor-oan sira ne’ebé serbisu iha li’ur konstribui ona reseita ekonomia mai Timór hamutuk millaun $121, hosi Austrália kontribui ona millaun $33, enkuantu iha Inglatera, Irlándia no fatin balun mós kontribui ona, liuhosi haruka osan mai família hodi bele utiliza sosa buat balun iha Timór.

“Ita-boot sira hotu sei hamnasa bainhira rezultadu ne’ebé imi hetan iha rai-li’ur bele haruka mai família sira iha Timór no sira sei kontente. Ho nune’e, husu ba ita-boot sira atubele kontribui bainhira serbisu ona iha Austrália, buka halo hahalok di’ak hodi bele haforsa,” nia enkoraja.

Nune’e, liuhosi serimónia despedida ne’e nu’udar pasu ida atu loke dalan ba traballadór sira atu bele kontribui muda an, muda família no ajuda muda nasaun tanba hanesan oportunidade di’ak, maski susar tebes husik timor-oan hodi bá serbisu iha rai-li’ur, maibé Governu sei esforsu nafatin halo buat hotu hodi kontinua ajuda nafatin timor-oan sira ne’ebé durante ne’e serbisu iha ne’ebá atu filafali mai bele integra iha sosiedade.

Biban ne’e, PM husu ba família traballadór hodi utiliza osan ne’ebé traalladór sira manda ho di’ak.

Iha biban hanesan, Diretór Nasionál Empregu Exteriór (DNEE), Filomeno Soares, hateten traballadór timor-oan sira ne’ebé mak hetan oportunidade hodi bá serbisu iha Austrália hahú hosi tinan 2012 to’o ohin loron hamutuk 6.000 resin, maibé agora daudaun iha tinan 2022 ne’e Sekretaria Estadu Formasaun Profisionál no Empregu (SEPFOPE) sei haruka tan traballadór hamutuk 3.000 resin atu ba tan iha tempu besik.

Tuir planu no programa SEPFOPE, hakarak atinje kada tinan haruka timor-oan sira bá Austrália hosi 1.500 to’o 2.500.

“Ita iha traballadór ne’ebé ohin asina ona kontratu ho Governu hamutuk 214, kompostu hosi mane 122 no feto 92, ne’ebé sira sei dezloka tuir faze, oráriu dezlokasaun iha ona sira no sei arranka iha faze datoluk. Traballadór sira sei serbisu barak liu iha ortikultura no ko’a na’an,” nia dehan.

Daudaun ne’e iha programa rua maka loke oportunidade ba timor-oan sira atu ba serbisu iha Austrália, maibé programa rua ne’e halo sai ida de’it ona maka programa Pasific Australia Labour mobility, ne’ebé sei sai hanesan sombriña ida hodi tau-matan fali ba programa rua seluk ne’ebé iha.

Programa foun ne’e loke ona oportunidade ba traballadór timor-oan sira hodi bele serbisu iha Austrália hahú hosi fulan-sia to’o tinan-haat.

Ho nune’e, traballadór ne’ebé mak sei dezloka iha tempu besik tuir faze ne’e, kompostu hosi grupu 11 mak hanesan Connect Group iha traballadór na’in-11, Connect Group iha na’in-sia, Kuala Farm 16, Cutri Fruit 14, Hillwood Berries TSL 10, Hillwood shothart 10, Hillwood Berries 19, Tasmania Berries Group I 24, Tasmania Berries Group II 68, Labour Solution 25, Meet Work iha na’in-sia.

Jornalista : Tomé Amado

Editora     : Julia Chatarina

PUBLISIDADE HUSI MTCIiklan

HAKEREK NO HATÁN

Please enter your comment!
Please enter your name here